Shillong, Nohprah 19 : Ka Kynhun Myntri ka la mynjur ban pynkylla ïa ka Rule 374, ka ban pynhiar ïa ka dor shalan (export) ïa ka Extra-Neutral Alcahol (ENA) ba pynmih na Jylla Meghalaya.
Ka jingpynhiar ka dei kaba la leh da ka jingthmu ban lah pynïaid ïew ïa ka ENA ba shna ha Jylla sha ki ïew ka thaiñ Shatei Lam Mihngi, kaba mynta ka mad ïa ka jingeh ha ka dor kaba heh kumba 5 haduh 6 shah haba nujor bad ka dor ka Assam.
“Ngi la pynhiar ïa ka dor shalan jong ka ENA ka ban sa shalan napoh ka Jylla” ong u Myntri Rangbah Conrad K Sangma haba ïakren bad ki lad pathai khubor hadien ba dep pynïaid ïa ka jingïalang ka Kynhun Myntri ha ka sngi Thohdieng.
“Lah leh ïa kane ban pynthikna ba ka jingpynmih ïa ka ENA bala leh ha ka Jylla jong ngi kan dei kaba lah ban pynïaid ïïew ha ka ïew ka NE. Mynta ka jingdie ïa ki mar shabar ka Jylla Meghalaya ka long tlot bha namar ka dor ka heh haduh san shah, hynriew shah ban ïa ka Jylla ba marjan ka Assam. Da ka jingpynhiar ïa ka dor-kham rit ban ïa ka dor ka Assam-kan pynlah ïa ngi ban die ïa ka mar shabar ha ka thaiñ Shatei Lam Mihngi bad kane kan pynthikna ba ka jingpynmih pisa jongka Tnad Excise kan kiew” ula bynrap.
