Mynjur ka KHADC ïa ka Vote on Account, khlem kren eiei ki dkhot ba burom ïa u Dr.Ricky

Shillong, Rymphang 20: Ka Khasi Hills Autonomous District Council (KHADC) ha ka sngi ba khatduh jong ka dorbar mang tyngka kala mynjur bad pass beit ïa ka mang tyngka ba shipor ne ka Vote on Account ba tang lai bnai na ka bynta jong u snem 2026-2027.
Ïa kane ka mang tyngka la shu pass beit bad mynjur khlem da don kiba ïa shim bynta ba ïathir ne ban ïa kren halor ka vote on account, namar ka jingburom ïa ka jingkhlad noh u MP u (L) Dr Ricky AJ Syngkong.
Kane ka Vote on Account jong ka jingmang tyngka na ka bynta ka jingpynlut kadei tang na ka bynta lai bnai kaba dei naduh ka Shi tarik u bnai Ïaiong haduh ka 30 tarik u bnai Jylliew, 2026.
Ka jingmang tyngka ban pynlut ha kine ki lai bnai jong ka KHADC ka kynthup ïa ka tnad General Administration Department (GAD) ka jingmang ban pynlut ka long T.9, 14, 51, 600 klur, katba ha ka tnad Law la mang ban pynlut kumba T. 18, 53, 920 lak.
Ha kaba ïadei bad ka tnad Revenue Budget & Finance Department la mang tyngka ban pynlut ka long T. 2, 76, 64, 360 klur, katba ha ka tnad Forest Administration Department ka jingmang tyngka ban pynlut ka long T. 2, 84, 41, 860 klur bad ha kaba ïadei bad ka tnad Administration of Justice & Judicial Department la mang T. 1, 80, 43, 850 klur.
U Bah Seibor u la ïathuh ba ha kaba iadei bad ka tnad Legislative Department ka mang tyngka ban pynlut ka long T. 2, 36, 39, 150 klur bad ha kaba ïadei bad ka tnad pule puthi ka jingmang ban pynlut ka long T. 4, 11, 520 lak ha ka tnad Civil Work & Development ka mang tyngka ban pynlut ka long T. 16, 24, 94, 700 klur bad ha ka Enforcement Scheme for protection of Tribal Land & Interest ka mang tyngka ka long T. 1, 59, 82, 870 klur.
U Executive Member ba peit ïa ka Finance u Bah Seibor haba kren ha ka sngi ba wanrah ïa kane ka mang tyngka ha ka sngi sdang ka dorbar u la ïathuh ba ïa ka mang tyngka kaba pura jong ka Khasi Hills Autonomous District Council yn sa wanrah pat ha ka sien shong dorbar ka ban wan.