Mynjur ka KHADC da ka Official Resolution ban pyrshah ïa ka UCC ka Sorkar India

Shillong, Jylliew 24 : Ka Dorbar Mangtyngka jong ka Khasi Hills Autonomous District Council ha ka sngi Saitjaiñ da kawei ka sur ka la mynjur da ka Official Resolution ban pyrshah jur ïa ka jingpyntreikam ïa ka Uniform Civil Code jong ka sorkar India ha u pud u sam jong ka Council.
Haba wanrah ïa kane ka Resolution, u CEM ka Council, Bah Pynïaid Sing Syiem, u la ong ba ka Executive Committee ka la rai ban wanrah ïa katei ka Official Resolution hadien ba ki ïoh jingtip ba ka sorkar India ka thmu ban pyntreikam ïa ka UCC ha baroh kawei ka Ri.
“Hadien ba ngi ïoh jingtip ba ka sorkar India ka thmu ban wanrah ïa ka UCC ban pyntreikam ha ka ri India baroh kawei te kum ka Iing baroh kawei kiba don ka jingsngewkhia bad jingkitkhlieh kum ki dkhot ba la shah jied ngi shim ïa ka jingkitkhlieh ba kino kino ki ain jong ka sorkar India kin ym ktah ïa ka jinglong kyrpang jongngi,” u la ong.
Katkum ka jingong jong u, katei ka UCC lada pyntreikam kan ktah ruh ïa ka riti dustur, ka rukom ïoh pateng, ka ïathoh shongkurim bad wat ha ka jinglaitluid ha ka lehniam leh rukom.
“Ngi long ka Jaidbynriew kaba kyrpang ha ka riti dustur kiba la ïada da ka Khyrnit kaba Hynriew la ka long naduh ka khyndew ka shyiap kaba ngi long trai katba kiwei ki jylla kim ïoh ïa kane ka hok long trai. Haba ngi phai sha ka synshar khadar tynrai ngi don ki synshar Syiem kaba da ki spah spah snem kane ka synshar Syiem ka la don ha ka ri jongngi. Kumta ka jingdon jong ka Khyrnit kaba Hynriew la nang pynskhem shuh shuh ïa kine baroh,” u la ong.
U ong ruh ba la aibor ïa ki MDC ban wanrah bad thaw ïa ki ain bapher bapher la ka long ban pynneh ïa ki riti dustur, ka synshar khadar bad kiwei kiwei kiba ngi donkam ban pynsah.
“Haba phi phai sha ka long kur long jait, ngi sngew kyrpang ba ka Jaidbynriew Khasi jongngi, ngi ai jait sha ka Kmie bad haduh kine ki sngi ngi long kyrpang ba ngi jait sha ka kmie. Ngi kyrmen skhem ba kane ka Khyrnit kaba Hynriew ba ngi don mynta da ki phew snem ba kum ki MDC ngin kut jingmut ban nang ïai pynneh pynsah ïa ki riti dustur ba riewspah jongngi.”
Na ka liang u Nongïalam ka Liang Pyrshah, Bah Titos W Chyne pat u la pynkynmaw ba ha ka por ba u dang bat kum u CEM u la lum lang ïa baroh lai tylli ki Autonomous District Council ba kynthup ïa ka KHADC, JHADC bad GHADC ba kin pyrshah jur beit ïa ka jingpyntreikam ïa ka UCC ha ka jylla bad ha u pud u sam jong ka Council.
Shuh shuh u la ai jingmut ruh ïa ka KHADC ba kadei ban thoh sha ka Law Commission jong ka Ri ban pynsngew halor ka nongrim ba ka Council ka ieng ban pyrshah ïa ka jingpyntreikam ïa ka UCC.
Kiwei pat ki dkhot kiba shim bynta lang ha katei ka jingïatai halor katei ka Resolution ki kynthup ruh ïa u Bah PN Syiem ba dei u Deputy CEM, nangta u Bah Bindo M Lanong bad kiwei kiwei.
Hadien ba na ka Liang Pyrshah ruh ka la ai lang ka jingkyrshan ba pura ban pyrshah ïa ka UCC, u CEM ka Council, Bah Pynïaid Sing Syiem u la ong ba kin sa thoh ruh sha ka National Law Commission ban pynpaw ba na ka liang ka KHADC ka pyrshah jur ban pyntreikam ïa ka UCC halor ka nongrim ba kane kan ktah jur ïa ka riti dustur ba kyrpang kaba kane ka jylla ka don.