Shillong, Jymmang 27: Ka Indian Institute of Technology (IIT), Guwahati kala mynjur ban long kum ka kynhun mamla ba lai (Third Party) ban tohkit halor ka jingtwa ka dome jong ka Ïingdorbar Thaw Aiñ ba thymmai ka Jylla ha Maw diangdiang, New Shillong Township.
Haba pyntip ïa kane hynne ka sngi thohdieng, u Myntri Rangbah ka Jylla Conrad Kongkal Sangma ula ong ba ka Sorkar Jylla kala ïoh ïa ka jingtip na ka IIT Guwahati ba ka kloi ban wan bad shimti kum ka kynhun mamla ba lai ban jurip bad tohkit ïa kane ka jingjia ha Mawdiangdiang.
“Ngi khmih lynti ïa ki (IIT, Guwahati) ba kin wan ha kine ki khyndiat sngi ban wan ban jurip bad wad bniah ïa kaei kaba jia” ula ong haba kular ba kan dei ka kynhun ba laitluid bad ka bym don jingïadei na baroh ki liang mamla kata ïa ki Designers bad ki Contractor nalor ka Sorkar Jylla.
Napdeng ki lai tylli ki IIT ba kynthup ïa ka Kolkata bad Delhi, kawei kala pynpaw ïa ka jingbym lah ban pdiang ïa ka jingkyrpad jong ka Sorkar Jylla, pyntip u Conrad.
Haba pynpaw ba kane ka jingtei ka dei ka project kaba pher bha, u Conrad ula ong ba kum kine ki project ki dei ki bym pat ju pyntrei ha ka thaiñ Shatei Lam Mihngi bad lada khmih ïa baroh ka thaiñ Lam Mihngi, tang ka Victoria Building ha Kolkata kaba don ïa ka dome.
“Kat kum ka jingtip jong nga, nga tharao ym pat don ha ka thain lam mihngi ban don ïa kum kine ki project khlem ïakren ïa ka thaiñ Shatei Lam Mihngi bad ka dei kaba shitom bha ban pynkhreh la ka dei ha ka design ne ha ka jing pyntrei ïa ka jingtei” ong u Conrad.
Halor ka jingdawa jong ka Congress ban weng noh ïa u Bah Dasakhiat Lamare kum u Myntri ka Tnad PWD (Building) bad ruh ban leh eiei pyrshah ïa u Executive Engineer ka PWD (Building) u Myntri Rangbah ula ong “Ka Politics hi ka long beit kumne”.
U Myntri Rangbah ka Jylla ula ong ba ka Sorkar Jylla hi kala ieng skhem ha ka nongrim ba ka jingtei ka dei ban long kaba paka haba pyntip ba ka jingkhia jong ka dome marwei kala kot haduh 4,500 metrik ton lane 4 lak kilo.
Haba kyntu ïa ki kynhun bapher bapher ban ap ïa ka kaiphod jingtohkit ban dup lap ïa ka jingshisha halor kane ka jingjia, u Conrad ula ong ba ka dang kloi palat ban shu pynkut ïa kiei kiei bad kynnoh ba ka dei namar u Myntri ka Tnad PWD (Building) ba kane kala wan jia. “Ai ba ka kaiphod kan mih bad ngin sa shim ïa ka rai” ula kular.
Halor ki kyndon jong ka tender bala kynnoh pynkheiñ haba pyntrei ïa kane ka project, u Myntri Rangbah ula ong ba ka UPRNN Ltd kala sub contract tang ïa katto katne percent ka kam sha kiwei pat ki kompani.
Halor ka jingkynnoh sahteng ka jingtohkit CBI ïa ka UPRNN Ltd bad ka Design Associate, Noida, u Conrad ula ïathuh ba ïa ka Design Associate la thung da ka Sorkar barim jong ka Congress ym da kane ka Sorkar ba mynta.
“Ka bynta ba nyngkong eh ka long ba ïa ka Design Associate la thung da ka Sorkar barim bad kane hi ka dei ka kam ba ngam kwah ban kynthoh namar ïa kane ka kam la leh hashuwa ba ngin wan ma ngi” ula ong.
