Shillong, Risaw 24: Ka KHADC ha ka sngi Thohdieng ka la mynjur ban ai da ka NOC ban shna ïa ka surok na Wahkaji sha Nongtnger ïa kane la kular da u Executive Member (EM) ka Khasi Hills Autonomous District Council (KHADC) ba khmih ïa ka tnat Council Assets Bah Pynkhrawboklin Kharjahrin ula pyntip ba ka District Council ka kloi ban ai No Objection Certificate (NOC) ïa ka Sorkar Jylla ban maramot ïa kane ka surok kaba don ha South West Khasi Hills.
U EM ula pyntip ïa kane haba jubab ïa ka jingkylli ba la wanrah da MDC ka Ranikor Bah Pius Marwein uba la pyntip ba ki paidbah na ki 11 tylli ki shnong ki kwah na ka KHADC ba ka dei ban aiti noh ïa ka surok Wahkaji sha Nongtnger sha ka tnat Public Work Department (PWD) ka Sorkar Jylla khnang ban ïoh maramot namar ïa kane ka surok la shu ieh khlem da maramot mynta da ki bun bun snem.
Halor kane u Bah Marwein ula ïathuh ba ka surok naduh Wahkaji lyngba Nongtner shaduh Mawthabah ka don 21 km bad ka ïaid lyngba ki 11 tylli ki shnong kiba la mad jingeh mynta da ki phew snem namar ka jingsniew palat ka surok.
Haba pynpaw halor kane u EM ula ïathuh ba ha u snem 2006 ïa ka surok Wahkaji shaduh Mawthabah kaba don 21 km la bei tang da ka UCIL kaba kwah ban tih Uranium hynrei hadien ba kam ïoh lad ban tih Uranium ne ba ka sngew ba ka khlem ïoh jingmyntoi, ka la shu ieh noh khlem da maramot shuh.
U Bah Kharjahrin u la ong ba ka jingkyntait ka District Council ban aiti noh ïa ka surok Wahkaji sha Nongtnger kadei namar ba kane ka surok ka ïaid lyngba ki shnong ba don Uranium bad ka KHADC ka kwah hi ban ïai long trai ïa ka surok bad ïa ka jaka ban pynskhem ïa ka jingpyrshah tih Uranium.
U la ong, “Ngi kloi ban ai NOC ïa ka tnat PWD ka Sorkar Jylla ne kiwei pat lada ki kwah ban maramot ïa ka surok hynrei ngim nym aiti pat ïa ka surok namar ngi kwah ban bteng long trai hi ïa ka surok bad jaka namar ka dei ka nongkynti jong ka Council.”
Haba ïaibteng ban buh jingkylli u MDC ka Ranikor u la ong, “Nga kyrpad ïa u EM bad ïa ka EC ban leit jurip ïa ka surok bad sngap ïa ka sur jong ki paidbah kiba ïai mad jingeh namar ka jingsniew palat ka surok Wahkaji-Nongtnger, bad ki paidbah ki hap ban ïaid na ka kjat da ki phew kilomitar wat ban leit shim dawai bad phah sumar”.
Halor kane u EM haba jubab ula ong, “Ka District Council kam don pisa ban maramot, hynrei ka EC ka kloi ban ai ïa ka NOC lada ka Sorkar Jylla ka kwah ban maramot.”
Haba iathuh shuh shuh ïa ka jinglong kongsan kane ka surok u Bah Pius u la ong ba lada ïoh ïa ka NOC kane ka surok kaba leit sha ki 11 tylli ki shnong ban hab ruh hapoh ka thup jong ka PMGSY (4) jong ka sorkar pdeng bad kane kan wanrah ka jingmyntoi kaba khraw bha ïa ki nongshong shnong kane ka thaiñ kiba la shah ieh beiñ mynta la da ki phew snem na ka jingsniew ka surok.
