Mynjur da ka Resolution ban pynïoh biang ïa ka J&K kum ka jylla ba pura, dawa ki party bad ki seng

Jammu, Risaw 12 : Ka kynhun jong ki seng saiñpyrthei bapher bapher ryngkat ki seng ha ka sngi Saitjaiñ ki la kyntu ïa ki party ban ïalam ïa ka sorkar thymmai ha Jammu & Kashmir, ka National Conference – Congress ba kin wanrah da ka Resolution ha ka jingïalang ba nyngkong jong ka Kynhun Myntri ba kin pynïoh biang ïa ka jylla ba pura ha Jammu & Kashmir.
Ki dkhot ka All India Party United Morcha (APUM), kiba kynduh ha Jammu, ki ai ka jingkitbok ruh ïa ka kynhun synrop jong ka NC-Congress ha ka jingjop ha kane ka elekshon ba dang shu dep, ong ka kyrwoh.
Ka NC ka la jop haduh 42 seat na ki 90 seat kaba dang shu long shen katba ka Congress pat ka jop hynriew ngut. Kumta kine ki ar tylli ki party ki la ïoh ban don ha ka jingbun paid ha katei ka Iing Dorbar kaba don 95 ngut ki MLA. Ïa ki san ngut kiwei pat ki MLA yn sa thung hi da u Lieutenant Governor.
Nalor kine ki don ruh haduh saw ngut ki MLA shimet bad uwei u MLA na ka AAP kiba la tyrwa ban trei lang ha kane ka sorkar synrop.
Ha ka jingïalang kaba long ha iing sah jong u MP barim u Sheikh Abdul Rehman, ka APUM ka la kyntu jur ïa ka NC Congress ba ka dei ban wanrah beit da ka Resolution ha ka jingïalang ba nyngkong jong ka kynhun Myntri kaba dawa ba dei ban pynïoh biang ïa ka jylla ba pura ha Jammu bad Kashmir, nangta ban ai ei 200 unit ka bording bad ruh ban ai jingkyrshan ïa ki nongbylla sngi.