Shillong, Jylliew 17 : Ka jingkhlad jong ki sawngut ki shipara na ka jingtwa khyndew hynin ka sngi Palei ha Laitlarem, Nongspung ka la pynlong ïa baroh kat kiba leit ban sngewlem ban ym lah satia ban kun ïa ki ummat da ka jingsngewsynei halor katei ka jing shem lanot ba katei ka longïing ka kynduh.
La ïohi ruh ba hapdeng u lapbah ba jur, ki paidbah na kylleng ki shnong ki la tuid sha katei ka jaka ban leit sngewlem lang ïa katei ka longïing.
Ha kane ka sngi, na ka liang u Myntri ka tnad Revenue and Disaster Management ka sorkar jylla, Bah Kyrmen Shylla ruh dalade hi u la hiar ban sngewlem sha katei ka shnong ban kynduh markhmat ïa ki kmie ki kpa bad ki ba haïing kiba la mad ïa katei ka jingjia ba sngewsih.
“Katno nga pang ka mynsiem bad sngew myllung haba nga ïohi markhmat ïa ki ba ki thiah iap hangtei, tang U Blei u ban pyntngen ïa ka mynsiem jong ki,” ong u Myntri haba kren bad ki lad pathai khubor hadien ba u la dep ban kren ïa ki ba haïing.
U Myntri ha kane ka sngi u la pyntip ruh kumba ka ka sorkar ka la dep ban pynbna, kin sa ai saw lak tyngka marwei marwei na bynta kitei kiba khlad. Shuh shuh u la ïathuh ruh ba na ka bynta ka ïing ka tnad kan sa peit bad leh ïa kaba donkam katkum ki kyndon jong ka sorkar.
Hadien kane, u Myntri u la leit ruh ban peit ïa ka ïing kaba la julor na ka jingtwa ka khyndew ha ka step sngi Palei kaba la long ka daw ka jingiap jong kitei ki shipara.
ïa u Myntri la synran lang ha kane ka sngi naduh u MLA ka thaiñ Bah Eugene Lyngdoh, ki heh sorkar kynthup ïa ka Kong Matsiewdor War. La donlang ruh ha kane kasngi naduh u MLA ka Sohiong Bah Samlin Malngiang kumjuh u MDC ka thaiñ Bah Sherbor Mawlong.
Haba ïoh pat ban ïakren bad ki bahaïing, ki la ïathuh ba na ki lai ngut ki khun kiba lait im ha katei ka jingjia, u khun heh ba la 12 snem u don mynta ha ka jingsumar, katba ki arngut kiwei pat kynthup ïa uba saw bad iba rit duh ki don ha ka met kaba koit ba khiah.
