Shillong, Nailur 28: Ka Pay For Right Football Academy bad ka Mawlum Tyrsad ki la khur jingjop ha la ki jong ki jingïakhun jong ka lympung 1st Meghalaya Women’s State League 2025, kiba la long ha ka sngi Saitjaiñ. Baroh ar tylli ki jingjop ki la long kiba itynnad hynrei kiba ïapher bak-ly-bak kawei na kawei pat.
Ha ka Group A kaba long ha nongbah Shillong, ki thei ïalehkai jong ka Pay For Right Football Academy ki la pynjemkhnap ïa ka Lapalang SSCC da 11-1 kol, ha kaba ka khlur ïalehkai jong ka jylla Meghalaya ka Nisilia Majaw ka la pynkhihwin da kaba thep haduh 6 kol katba ka Makrisha Songthiang ka la pynkhihjar saw sien.
Nangta ha ka Group B, ka Mawlum Tyrsad ka la shah lamkhmat ar sien ha ka jingïalehkai pyrshah ïa ka Jakrem shuwa ba kan wanphai ban jop ïa ka jingïakhun da 3-2 kol.
Ka PFR ka la wan ba-ar (runners-up) ha ka Women’s League 2024 jong ka Shillong Sports Association bad ki dang phaikhmat ban ïakhun tyngeh na ka bynta ka nam lahduh ha kane ka lympung MWSL kaba nyngkong. Tang ha ka kylla step ka Nisilia ka la ïoh ban pynkhihjar haduh san sien (10′, 13’P, 33′, 41′, 45′) bad ka la bynrap biang sa kawei ha ka minit kaba 72 ha ka kylla miet shuwa ba kan shah bujli noh na ka bynta ki 10 minit ba khatduh jong kane ka jingïalehkai. Ha kawei pat ka liang ka Makrisha, ka la ïoh ban pynkhihjar ha ka minit kaba 19, 43, 56 (penalty) bad ha ka 58 minit, bad ka jingdon jong ka-ka la ai mynsiem ïa ka kynhun ban ïalehkai bha ha baroh kawei ka jingïalehkai.
Na ka liang jong ka kapten jong ka PFR ruh, ka Aetisha Lytan (67′) ka la ïoh ban thep kawei, katba ka Shailinda Dkhar (61′) ka la pynthikna ba ka Lapalang, lahduh jong ka Riwar Mihngi Football Association, la kumno kumno ban thep kawei ka kol ha ka jingïalehkai ba nyngkong jong ki ha kane ka league kaba thymmai jong ki kynthei ha ka jylla baroh kawei.
Haba phai pat sha ka jingïakhun ha Mawlum Tyrsad, ka Jakrem SC (ka lahduh na ka Mawkyrwat District Sports Association), ka la ïoh ban lamkhmat mar ïasdang lyngba ka Iaphishisha Marbaniang (2’). Ka Naisha Nongrum (45’+1) ka la ïoh ban pynïakhaid noh ïa ka kol tang shuwa ban wai ka kylla step.
Ka Jakrem SC ka la pynkhihjar biang ha ka minit kaba 50 ban lamkhmat ïa ka jingïalehkai lyngba ka Chibalsaldei Sangma hynrei kim shym la lah satia ban ïada ïa ka kol ha kaba ka Mawlum Tyrsad SC kaba dei ka lahduh jong ka Tyrsad Area Sports Association’s women’s League ka la wanphai biang bad khur syndon ïa ka jingjop lyngba ki kol na ka Balawanbiang Khongsit (56′) bad ka Ibashemba Khongsit (69′).
Ki jingïalehkai ban wan jong ka MWSL kin long ha ka 02 tarik Risaw. Ha ka Group B, ka Mawten SC kan ïakhun pyrshah ïa ka Bright Future SSCC ha ka por 12 baje mynsngi, bud sa ka jingïakhun jong ka Mawsawrit SC pyrshah ïa ka Young SCC ha ka por 2:30 baje nohphai sngi, baroh artylli kin long ha Mawlum Tyrsad. Ha ka Group C, ka Chirupheiwi Nongkynrih FC kan aireng pyrshah ïa ka Diengshynrum SC ha ka por 2 baje nohphai sngi ha madan Laskein.
