MWSL 2025: 11 kol marwei thep ka Iarapalang Nongrum; kut noh ki jingïakhun ha ka Group B

Shillong, Risaw 23: Katba ki jingïalehkai jong ka lympung Meghalaya Women’s State League 2025 ki dang ïaid shakhmat, ki la mih paw ki jingïalehkai kiba noh shiliang bha ha ka resol, ha kaba ki thei ïalehkai jong ka Laitkor ki la pynliem kput khlem jingmap haduh 23-0 kol ïa ka Lapalang ha ka jingïakhun kaba la long ha ka sngi Nyngkong, ha SSA Stadium, Shillong.
Hynrei watla katta ruh, ki thei ïalehkai ka Lapalang SSCC (jong ka Riwar Mihngi Football Association) ka la pynkut ïa ka jingïalehkai da ka durkhmat kaba phuh samrkhie ha ka por ba ki ïa khublei kti bad kdup ïa ki nongïalehkai ka Laitkor SC (Shillong Sports Association) kaba la khur ïa ka jingjop kaba shyrkhei tam kaba la rah biang ïa ki sha ka kyrdan ba ha khlieh duh jong ka Group A.
Ka Iaraplang Nongrum (1′, 7′, 9′, 25′, 29′, 60′, 66′, 68′, 73′, 80′, 90’+1) ka la thep marwei haduh 11 kol, kiwei pat kiba la noh synñiang ha ka thup thep kol ki long ka Ilenaki Laloo (23′, 40′), ka Saralin Warlarpih (26′), ka Inrila-i-dor Khongthaw (30′, 42′, 45′, 49′), ka Eiladki Ksoo (65′, 90′), ka Ibashisha Khongwet (69′, 83′, 87′).
Ha kawei pat ka liang, ka Group B’ ka la pynkut ïa ki jingïalehkai hynnin ka sngi, ha kaba ka Jakrem SC (Mawkyrwat District SA) ka la pynliem noh ïa ka Young SSCC (Pyndengumiong DSA) da 3-1 kol. Ka Banhunlang Synrem (27′), ka Banrihun Wahlang (47′) bad ka Iaphishisha Marbaniang (86′) ki la pynkhihjar na ka bynta ka Jakrem bad ka Bankyntiew Ryntathiang (32′) na ka bynta ka Young SSCC.
Kane ka jingjop ka mut ba ka jingïakhun kaba ar kam don jingmut satia ïa ka Mawten SC (Mawkyrwat DSA), kaba la rung sha ka Quarterfinal kum ka kynhun kaba saw na ka Group B ban jam shakhmat. Ka Mawten bad ka Young SSCC ki la khur mar 4 poiñ. Ha kaba kut ka la shah rem noh ha ka Mawsawrit SC (Tyrsad Area SA) kaba don ha trai duh da 5-0 kol.
Kum ka Group kaba heh duh – kaba don hynriew tylli ki kynhun – ka Group B kan phah saw tylli ki kynhun sha ka quarterfinal. Kine ki long ka Mawlum Tyrsad SC (Tyrsad Area SA), ka Jakrem, ka Bright Future SSCC (Pyndengumiong DSA) bad ka Mawten.
Ka group stage ka dang sah sa tang ar tylli ki jingïakhun, baroh ar ki dei ha ka Group A. Ha ka sngi Saitjaiñ ka Attacker’s Youth Club jong ka Pahamsyiem kan aireng pyrshah ïa ka Lapalang ha ka por 10 baje mynstep ha Shillong. Nangta ha ka sngi Nyngkong, ka Laitkor kan ïakhun pyrshah ïa ka Pay For Right Football Academy ha kajuh ka por bad ka jaka.