Nongpoh, Ïaiong 30: Ban ioh jingtip kham bha ïa ka rukom treikam ki Pulit ban ai ka jingïada ha ka imlang ka sahlang katkum ka kamram ba la bynshet da ka sorkar, ki khynnah skul jong ka Christ School Nongsder hynnin ka sngi ki la leit ban iuh kjat ha Umïam Police Station na ka bynta ban twad jingmut halor shibun ki rukom treikam ki pulit kiba ai jingïada ïa ki paidbah.
Kumba 40 ngut ki khynnah skul katei ka skul ha ka jingïalam ki nonghikai ki la ioh lad ban kynduh ïa ki Officer In-charge na ka bynta ban twad jingmut ne lum jingtip halor ki rukom treikam ki Pulit kiba ai ka jingshakri na ka bynta ban ai ka jingïada ha ka imlang sahlang.
Ha kane ka jingleit ïuhkjat ha Umïam Police Station, ki pulit ophisar ki la ioh lad ruh ban pynshai sha ki khynnah skul halor ki rukom treikam ki pulit, ka kam ram ki pulit khatam ha kaba ïa khun pyrshah ïa ki kam sniew ban wan rah ïa ka shongsuk shongsain ha ka imlang ka sahlang.
Ka jingmyntoi kaba ki khynnah skul ki la ioh lum na kane ka jingleit ïuhkjat ha katei ka Police Station ka long ka jingpynshai na ki Pulit ophisar ba ki paidbah kim dei ban don kata ka jingtieng ïa ki Pulit bad khamtam ki khynnah skul ki dei ban wan shakhmat lada don kano kano ka jingshah ban beit ne ka jingshah leh sniew khnang ba ki bor pulit kin ioh ban ai ka jingïada ha ka por kaba biang.
Ha kane ka sngi, ki pulit ka ophisar ka Umïam Police Station ki la ioh lad ruh ban ai ïa jinghikai halor ka jingktah jong ki jingdih ba sniew khamtam u drok, ban ai jinghikai halor ka NDPS Act, POCSO Act, Cyber Safety, road safety ha kaba kum ki khynnah skul ki dei ban tip bad ruh ki la ioh lad ban kylli halor shibun ki bynta ha ka jingioh lad ban twad jingmut na ki bor pulit kiba long kita ki nongai jingïada ïa ki paidbah.
Ha kawei ka bynta, dang shen kumba 50 ngut ki Khynnah skul na ka MeECL Umïam na ka Klas-9 bad Klas-10 ki la ioh ïa kane kajuh ka lad ban leit iuh kjat ha kane ka Police Station bad lyngba kane ka jingleit ïuhkjat (Exporsure visit), ki la ioh jingmyntoi shibun ban lum jingtip halor ki rukom treikam ki Pulit bad ka kamram kaba ki pyndep ban shakri ïa ki paidbah khamtam ha kaba ïakhun pyrshah ban pynduhjaid ïa ki kam sniew kam smeh.
