New Delhi, Nohprah 14: U National Spokesperson jong ka All India Trinamool Congress (AITC) u Saket Gokhale ha ka Sngi Balang u la mudui pyrshah ïa ka National People’s Party (NPP) halor ka jingbym pynpaw ïa ka jingpynlut pynsep ha ka elekshon kaba la long ha u snem 2018 hapoh 75 sngi.
Ha ka jingmudui, u Gokhale u la kynthoh ruh ïa ka jingphiel jong ka Election Commission of India (ECI) bad u Chief Electoral Officer (CEO) ka Meghalaya ban leh eiei pyrshah ïa ka NPP kaba la pynkheiñ ïa ki kyndon aiñ.
Katkum ki hukum jong ka Iingbishar Supreme Court jong ka ri India bad katkum ki rul ba la shna da ka Election Commission of India (ECI) ki seng saiñpyrthei ki dei ban ai ïa ka kaiphod halor ka jingpynlut pynsep sha u Chief Electoral Officer jong ka jylla hapoh 75 sngi ba la kut ka jingpynlong ïa ka elekshon lane 90 sngi ba la pynlong ïa ka elekshon Lok Sabha.
“Ym tang ba ka pynkyndit hynrei ka long kaba sngew triem ban sakhi kumno ka NPP ka la pyntroiñ ïa ki païa jong ka synshar paidbah katkum ka mon bad ka jingkwah jong ki,” u la ong.
