Shillong, Nohprah, 13: Ka Federation of Persons With Disabilities (FPWD) kaba long ka synjuk jong ki seng ki briew ba don don jingduna ha ki dkhotmet ka la mudui sha ka Meghalaya Human Rights Commission (MHRC) pyrshah ïa u kyrtong jong ka Indian National Congress (INC) na Sohiong Constituency u Bah Seiñ Osborn Kharjana halor ka jingkynnoh ba u kynthoh beiñ ïa ki briew kiba don jingduna dkhotmet.
Ka FPWD ka la phah ïa kane ka ujor sha u Chairman jong ka Commission ha ka 9 tarik mynta u bnai bad ïa kane kajuh ka jingujor la ai phah ruh sha ka Commissioner for Person with Disabilities, Shillong da kaba kyntu ban kin leh da kaba tyngeh ïa une u kyrtong ka Seng Congress na Sohiong.
Katkum ka jingujor ba la soi da u Chairman u samla Ferdinand L Marshillong bad ka General Secretary ka Samla Ibadalin Kharbuli, ka FPWD ka la kynnoh ba u Bah Seiñ Osborn Kharjana u la kren ha kawei na ki jingïalang paidbah ba long dang shen ha ka shnong Sohïong da kaba ong, “nga ju ong ïa kane kawei ka ktien ka long ba, haba ngi jied ïa u Rangbah Shnong, hi ju jied ïa uba matlah u rangbah shnong dei neem? phi ju jied ïa uba kyllut? ngim jied ïa uba kyllut ngin ym jied ïa u bym nang kren, ïa u bym lait kren ruh em balei phim jied ïa uba matlah, ïa uba kyllut, ïa u bym lait kren balei ym jied? ka daw ka long ba u don jingduna ha ka dkhotmet bad ngi tip hi ruh ba um lah ban synshar, kata ka dei ka jingjia borabor.”
Haba kdew ba kane ka jingkynthoh jong u kyrtong ïakhun elekshon jong ka Seng Congress na Sohiong ba ka dei k jingpynkhein ïa ki kyndon jong ka Chapter II bad XVI jong ka Rights of Persons with Disabilities Act, 2016, ka seng ka la kyrpad ïa ka MHRC bad ïa ka Commission for Person with Disabilities ba kan khanglad ïa ki riewshimet lane ïa ki kynhun ban ñiew beiñ ïa ki briew kiba don jingduna dkhotmet bad kyntu ruh ban shimkhia ïa kane ka kam bad ban ai noh kham kloi ïa ka jingbishar kaba hok..
Ban pynskhem ïa ka jingkynnoh, ka FPWD ka la aiti ruh ïa ki video ba la ring ïa ka jingkren jong u Bah Kharjana ha ka jingïalang kaba la long ha Sohïong dang shen.
