Mudui ejahar ka Kong Angela Rngad pyrshah ïa kiba pynphriang ïa ki video ha Social Media

Shillong, Nailar, 14: Ka seng ki nongdie madan ka MGSPHSVA ryngkat bad ka Kong Angela Rangad ki la mudui da ka ejahar ha Laitumkhrah Police Station pyrshah ïa ka jingpynsa-phriang ïa ki Video ha ka rynsan jong ka Social Media kiba pynbudnam ïa ka Seng bad ïa ki dkhot jong ka, khamtam ïa ka kyrteng jong ka kong Angela.
Ha kine ki Video lah ïohi ruh ba ki katto katne ngut ki briew ki la ringdur jubor bad pynbor ïa ki katto katne ki nongdie madan ban pyntieng bad ktah mationg ïa ka Seng bad ki dkhot.
Katkum u kyrwoh ba la phah da u General Secretary ka MGSPHSVA u Bah Shane Thabah, u la pyntip, “ha ka 12 tarik Nailar, la ïohi pylleiñ pylleiñ lyngba ki Video ba la pynsaphriang lyngba ki WhatsApp ba ki don ki riewshim kabu ki bym lah ban ithuh kiba pyndik bad pyntieng ïa ki nongdie madan bad dawa ba ki dei ban pyni ïa ki Identity Card (ID) bad la pynbor ruh ïa ki ban kren ne jubab ïa ki jingkylli. La ringdur ruh ha ka por ba kylli jingkylli. La ïohi shai kdar ba ki nongdie madan ki la sheptieng shikatdei bad la pynbor ïa ki ban jubab katkum ka jingkwah ki nongbyrngem. Kane ka jingleh ki riew shimkabu ka long ban pynthohbria ïa ka seng bad ïa ka dkhot jong ka (Angela Rangad).”
“Ngi dei ban tip shai ba ka kam die jingdie ha madan ka long katkum ka aiñ bad ka don ka Aiñ jong ka Sorkar India kaba ïadei na ka bynta ki nongdie madan kaba la mynjur naduh ka snem 2014, pynban ka Sorkar Jylla kam pat shym la pyntreikam ïa ka. Ka seng ki nongdiemadan ka la ïakhun bad dawa tyngeh ban pyntreikam ïa ka aiñ bad la ïakhun ruh ha Iingbishar Meghalaya High Court. Dang shen ha u bnai Jymmang u Muktiar ka Sorkar Jylla u la ai da ka Affidavit ba ka Sorkar kan sa pyntreikam noh shen ïa ka Aiñ. Niuma, katba ym pat treikam ka Aiñ, ka rai lane ka Status Quo Order jong ka Ingbishar Meghalaya High Court halor ki nongdie madan ka ieng bad ïada ïa ki nongdie madan,” ong u kyrwoh.
U kyrwoh u la pyntip ba ka 8 tarik mynta u bnai ka Seng ki nongdie madan ka la ïa don bynta ha ka jingïalang ba la khot da ka Deputy Commisioner jong ka East Khasi Hills bad la ïakren kyrpang ruh ïa ki jjngeh jong ki nongdie madan ha Laitumkhrah bad la ïa mynjur lang ruh ba baroh ki bor naduh ki shnong, Municipal, bor synshar District bad ki Pulit ryngkat bad ka seng ki nongdie madan kin ïashim bynta lang ban weng bad pynbeit ïa ki jingeh khlem da ktah ïa ka kamai jakpoh bad ka ïaid ka ieng ha lynter ka lynti.
“Ki riewshim kabu ki dei kiba khawpud kim nud ban pyni dur khmat lymne pynpaw ïa ki kyrteng bad ki knieh noh ïa ki dur ba la ring da ki nongïaid lynti. Shuh shuh kine ki riew shimkabu ki la pynjulor ïa ki mar ki mata jong ki nongdie madan kiba shong ha syndah ka madan Iewrynghep. Kine ki riewshim kabu ki la shim ïa ka aiñ ha ka kti bad ki leh ki kam be-aiñ. Kumta ka seng ka dawa ban kem bad pynsaja katkum ka aiñ. Ka tnat Pulit kan shim ïa ki CCTT kiba don hajan khnang ban ïohi ne tip ki dei kiei. Ban pynshitom katkum ki kyndon aiñ, kum ka jingpyrsaphriang ban pynthoh bria ïa ka long rynieng jong ki briew, ba pyndik bad pynsuh sat ïa ka ïaid ka ieng jong ki nongshong shnong kiba la batai shai ha ka Criminal Law Amendment Act,” ong u kyrwoh.