MSL 2024: Rung QF ka Chipakkore, haduh 3 tylli ki kynhun ba ïaryngkat point ha ka Group B

Shillong, Naiwieng 06: Ka Chipakkore ka la pynthikna ïalade ban rung sha ka quarterfinal jong ka lympung Meghalaya State League hadien ba ka la pynliem noh ïa ka Pinggera Do·gisik da 3-2 kol ha ka jingïakhun ba khadduh jong ka Group A kaba la long ha Tura.
Ka Chipakkore ka donkam beit ban jop, ka la lah ban pyndep ïa ka group stage khlem ka namrem bad khur 7 point, ban pynhiar kyrdan ba ar ïa ka Lumsohkhlur kaba la ïoh 6 point.
Katba ka jinglong jingman ha ka Group B ha Mawkyrwat ka long kaba ïakhaid, hadien ba ka Mawten ka la pynliem ïa ka Riangdo Youth da 3-1 kol. Ka Mawten ka la ïoh ban lamkhmat tang mar ïa sdang ka jingïalehkai lyngba ka kol na u Arnest Lyngdoh (3′) hynrei u Kordor Amora (62′) u la pynïakhaid ha ka kylla miet.
Hadien katto katne por ba la i kumba kane ka jingïalehkai kan kut ha ka jingïakhaid u Arrowstar Wanniang (90’+1) bad u Wiseman Kharsyiemiong (90’+5) ki la pynkhih ïa ar tylli ki kol ba kongsan ha ki minit pynjlan por shuwa ban kut ban knieh jyndat ïa ki 3 poiñ na bynta ka Mawten.
Kane kamut ba ka Mawten, Khliehmawlieh bad ka Sutnga ki la ïoh ban khur mar 6 point na kane ka Group. Ha kaba ïadei bad kane, ka tournament committee jong ka MSL kan sa pynshai ïa ki kyrdan jong ki kynhun hadien ka jingïalang mynta ka sngi.
Ha Khliehriat ka jingïalehkai na ka Group-D, ka Rymbai Skhenshynriah kaba la pynliem ïa ka Mulait United da 3-0 kol, ha kaba u Hesmiki Rymbai (39′, 58′) u la pynkhih ar sien bad kawei pat la thep da u Iaishah Bareh (52′).
Watla ka la khur ïa ka namjop hynrei kane kam shym la biang ïa ka kynhun ban jam shakhmat ka Rangdajied United (ha ka kyrdan ba nyngkong); ha kaba baroh ar ki ïa ryngkat mar 7 point hynrei ka RUFC ka tam lyngba ka jingïapher kol (goal difference) (RUFC +10 katba ka Rymbai +8). Hynrei ka R Skhenshynriah ka dang ïoh ban jam sha ka quarterfinal kum kawei na ki kynhun kyrdan ba ar kaba kham tbit.
Khadduh eh, ha ka Group F ha Shillong, ka Pynursla United bad ka Mawmluh ki la ïasam mar shi point naba ïakhaid mar 2-2 kol. U Riborlang Dkhar (7′) bad u Seiborlang Khongmawloh (24′) ki la buh hakhmat ïa ka Pynursla United ban tam haduh 2 kol hynrei u Balajiedlang Lyngwa (37′, 82′) u la khyrwit ar tylli ki kol ban pynthikna ba ki point yn ïasam hapdeng kine ki arliang mamla.
Ka jingïakhun ba khadduh jong ki 36 tylli ki jingïalehkai group stage kan long ha kane ka sngi Palei na ka Group C, ha kaba ka Seven United kan aireng pyrshah ïa ka Nangkiew Shaphrang Lumdiengngan ha ka jingïaknieh kyrdan ba ar. Baroh ar kynhun ki la kamai mar 3 point na ki ar sien ïakhun, katba ka Lumdiengngan ka ïoh ban tam lyngba ka jingïapher kol (0 to -2).

Ki jingïalehkai ha kane ka sngi Balang:
Group A (Tura): Pinggera Do·gisik 2 – 3 Chipakkore
Group B (Mawkyrwat): Riango Youth 1 – 3 Mawten
Group C (Tyrsad): ym don jingïalehkai
Group D (Khliehriat): Mulait United 0 – 3 Rymbai Skhenshynriah
Group E (Wahiajer): ladep baroh ka group stage
Group F (Shillong): Pynursla United 2 – 2 Seng Samla Mawmluh