Ki jingïalehkai ha ka Lah Sngi U Blei:
Group A (Tura): Lumsohkhlur 2 – 0 Atong Matgrik
Group B (Mawkyrwat): Khliehmawlieh 1 – 0 Sutnga
Group C (Tyrsad): Ladthadlaboh 3 – 0 Seven United
Group D (Khliehriat): Rangdajied United 8 – 0 Iatyllilang Lumsehkot Raliang
Group E (Wahiajer): 7 Wasa United 2 – 0 Seinbhalang Shkentalang
Group F (Shillong): Patharkhmah 0 – 10 Mawlai
Shillong, Naiwieng 04: Ka Mawlai SC bad ka Ladthadlaboh SC ki la long sa kiwei pat ki kynhun kiba la pynthikna ïa ka jaka ha ka quarterfinal jong ka lympung Meghalaya State League 2024 hadien ba ki la khur jingjop ha ki jingïalehkai ba la long hynne ka Lah Sngi U Blei.
Ha baroh lai sien lynter ki jingïakhun ka Mawlai ka la pynpaw ïa ka jingkhlaiñ bor jong ka da kaba pynliem suk haduh 10-0 kol ïa ka Patharkhmah ban synshar ïa ka Group F ha Shillong. Katba ka Ladthadlaboh, ka la jop da 3-0 kol ïa ka Seven United na ka Group C ha Tyrsad.
Watla pynmih madan kham bun ïa ki player ba dang khynnah, ka Mawlai ka dang lah ban poi sha ka thong jong ka jingjop, ha kaba u Samlang Rympei (45′, 45’+1, 50′, 84′) u la ïoh khyrwit hat-trick. Kiwei pat kiba pynkhihjar ki long u Balviky Marngar (22′, 26′), u Arkibor Makhroh (23′), u Romarius Laban (25′), u Mewanshan S Nongkseh (51′) bad u Mark Gareth D Shabong (81′). Kumta da kane ka namjop, ka Mawlai ka la ïoh pura 9 point naki lai sien ïakhun.
Haba phai pat sha ka jingïakhun kaba la apkhmihlynti hapdeng ka Ladthadlaboh bad ka Seven United, hynrei ka jingïalehkai ka khlaiñ shiliang, ha kaba u Sanki Langstang (38′), Banteilang Shylla (40′) bad u Lammida-o Dkhar (90’+2) ki la pynkhihjar na bynta katei ka kynhun kaba na West Jaintia Hills. Kumta ka Ladthadlaboh ka la ïoh ruh ban khur pura 9 point naki lai sien ïalehkai.
Ha kawei pat ka jingïalehkai kaba long ha Mawkyrwat naka Group-B, ka Khliehmawlieh, ka kynhun ba wan ba ar ha u snem ba ladep, ka la pynliem noh ïa ka Sutnga da tang 1-0 kol. Kane ka kol la thep da u Wallambok Shangpliang (87′) ha ki minit ba khadduh shuwa ban kut artad ka por. Hadien ba jop baroh ar sien ki jingïalehkai ba ladep, ka Sutnga ka donkam tang ban ïakhaid ban pynthikna kyrdan ba nyngkong ïalade na kane ka Group. Mynta, ka Sutnga bad ka Khliehmawlieh ki ïaryngkat mar 6 point, bad ki lah ban ïaryngkat bad ka Mawten ynda kane ka kynhun kan aireng pyrshah ïa ka Riangdo Youth lashai ka sngi Balang.
Ha Tura ka jingïalehkai na ka Group-A, la sakhi ïa ka Lumsohkhlur kaba la jam sha ka kyrdan ba nyngkong hadien ba pynliem da 2-0 kol ïa ka Attong Matgrik. Ka kol kaba nyngkong ka dei kaba la kum thep hi naka liang pyrshah ha ka minit ba 13 bad kawei pat na u Jestibor Mawlong (21′). Ka Lumsohkhlur ka la khur mynta 6 point hynrei ka jingïalehkai ba khadduh hapadeng ka Chipakkore (4 point) bad ka Pinggera Do·gisik (3point) ha ka sngi Balang kin rai ïa ka lahduh na kane ka Group.
Ka la don sa kawei ka jingjop da kaba thep bun kol ha ka jingïalehkai na ka Group D ha Khliehriat ha kaba ka Rangdajied United ka la pynliem haduh 8-0 kol pyrshah ïa ka Iatyllilang Lumsehkot Raliang. U Pasborlang Khonglikong (21′, 89′) u la thep ar kol, katba u RT Hanson Pdang (37′), u Balamlynti Khongjee (45′), u Owanijuh Pajuh (58′), u Freddy Banteilang Jyrwa (64′), u Manbhakupar Iawphniaw (74′) bad u Aenam G Jyrwa (78′) ki la ïoh ban thep mar kawei. Ka Rangdajied, kaba dei ka kynhun ba ïada ïa ka burom lahduh ka la khur mynta 7 point hynrei ka dang hap ban ap tad haduh da kut ka jingïalehkai ba khadduh jong ka Group hapdeng ka Rymbai Skhenshynriah (4 point) bad ka Mulait United (1) ban rai mano ban ïoh bat kyrdan ba nyngkong.
Bad khadduh eh, ka 7 Wasa United ka la lah ban khur ïa ka jingjop kaba nyngkong pyrshah ïa ka Seinbhalang Shkentalang da 2-0 kol na ka Group E ha Wahiajer. Baroh ar tylli ki kynhun kim don jingkyrmen shuh ban jam sha ka wat ïakhun kaba bud hynrei kane ka lahduh barim jong ka MSL ka la lah pat ban khur ïa ka jingjop ha kane ka samoi. U Jeff K Rymbai (20′) bad u Bannangsan Dkhar (65′) ki la ïoh ban pynkhihjar na bynta ka kynhun.
Kan don tang kawei ka jingïalehkai ha kane ka Sngi Hatmajai na ka Group C hapdeng ka Nangkiew Shaphrang Lumdiengngan pyrshah ïa ka Mawlum Tyrsad.