Shillong, Kyllalyngkot 09: Ka Shillong Lajong ka la ïakhun dohïap ban wanphai ha ka jingïalehkai hadien ba shah lamkhmat shi kol bad ban jop da 3-1 kol pyrshah ïa ka Rangdajied United ha ka jingïakhun quarterfinal kaba nyngkong jong ka Meghalaya State League 2024 ha Wahiajer Sports Complex hynne ka sngi Palei. Da kane ka namjop ka Lajong ka la kylla long ka kynhun kaba nyngkong ban poi sha ka semifinal.
Ka resol jong kane ka jingïalehkai ka la pynlong ïa ka Rangdajied – ka lahduh ba ïada ïa ka burom ban khyllem noh na kane ka lympung, kaba pynneh pynsah ïa ka dustur ha ka MSL – ha kaba ym pat ju don ki lahduh kiba la lah ban jop ar sien lynter ïa ka burom.
U Ieitlang Syiemlieh (4’minit) u la pynkhihjar nyngkong na bynta ka Rangdajied shuwa ba u Iohborlang L Lyngkhoi’s (7’P, 62’minit) un thep ar tylli ki kol bad kawei ka kol kaba la kum thep hi da u rangïalehkai ka RUFC – u Manbhakupar Iawphniaw (87’min).
Lah ban kdew hangne ba kane ka dei ka jingïakynduh kaba saw hapdeng kine ki arliang mamla ha ka MSL bad mynta ka Lajong ka la ïoh ban tam da 3-1 haba kyllumlang ïa ki jingïalehkai ba ladep baroh hapdeng jong ki (head-to-head) ha ka lympung MSL.
Hakhmat ki paidbah kiba shongshit bad kiba bun, u Ieitlang u la ïoh ban pynkhihjar khyndiat minit mar ïa sdang hadien ba u la lah ban pyndei tiak da ka khlieh ïa ka bol pashat ba la wan na u Owanijuh Pajuh.
Hynrei tang hadien katto katne minit, u Deibormame Tongper jong ka Lajong u la shah pynur hapoh phyllaw kol ka liang pyrshah ban ïoh ïa ka penalty. ïa kane ka penalty la shut da u Iohborlang bad khlem da pynsepei u la pynïakhaid na bynta ka kynhun.
Ha ka kylla miet, u Iohbor u la pynkhih ïa ka kol kaba itynnat na ka free-kick kaba la shut na shabar ka phyllaw kol ka liang pyrshah, kaba la ïaid lyngba ka kynroh jong ki bak. U Meshan Banjop Sumer u la ïoh ban ktah salit ïa ka bol hynrei u khlem shym la lah pat ban khanglad ban rung shapoh kol.
Ka RUFC ki la pyrshang ban wanphai biang ha kane ka jingïakhun hynrei kim shym la lah ban shem ïa ka kol pynïakhaid bad ka mynsiem ïakhun ka la sdang ban pjah hadien ba la kum bakla thep hi ïa kawei ka kol.
Kane ka kol ka la jia hadien ba u Yohaan Benjamin jong ka SLFC, uba don ha ka liang kamon, u la pashat thikna ïa ka bol da ka jingthmu ban shem ïa u paralok hynrei u Manbha Iawphniaw khlem da thmu u la thep ïa ka bol ha kol lade.
U Iohborlang u la khur ïa ka nam ‘Player of the Match’ bad u la ïohpdiang ruh ïa ka khusnam na u Wailadmiki Shylla – MLA ka Jowai.
Ki ar tylli pat ki Quarterfinal ban bud kin long ha ka sngi Saitjaiñ. Ha ka jingïalehkai ‘Jaintia Hills Derby’, yn sakhi ïa ka Sutnga (East Jaintia Hills) bad ka Ladthadlaboh (West Jaintia Hills) ki ban ïakhun pyrshah ha Diengshynrum Artificial Turf kaba ha Khliehriat; kane kan dei ka sien kaba nyngkong ïa kine ki arliang mamla ban ïakhun pyrshah naba kim pat ju ïakynduh mynno mynno ruh ha ka MSL.
Katba ha Shillong, ban pynlong ha SSA Stadium, yn sakhi ïa ka jingïalehkai kumba la jia ha ka semifinal jong ka MSL 2023, ha kaba ka Mawlai kan aireng pyrshah ïa ka Khliehmawlieh; ka Khliehmawlieh ka la lah ban pynliem ïa ka Mawlai ha u snem ba la dep ha ka semi final ba pynïalehkai ar wat (2 leg) hynrei ka la shah pynliem noh ha ka jingïakhun na bynta ka nam lahduh ha ka Rangdajied.
