Shillong, Jymmang 26: Ka kynhun Under-15 jong ka Seng Samla Mawlai Motsyiar ka la ïohrah ïa ka trophy kum ka namlahduh jong ka Inter Dong ba la pynïaid da ka Mawlai Sports Club, hadien ba ka la lah ban pynliem ïa ka Seng Samla Mawlai Phudmuri da 2-0 ha ka jingïakhun ïa ka final ha madanheh stadium, Mawlai Phudmuri ha ka sngi Saitjain ka 24 tarik u Jymmang, 2025.
Katba ha ka Under-17 pat la ïohrah Trophy da ka Seng Samla Mawlai Phudmuri kaba la lah ban pynliem ïa ka Seng Samla Mawlai Nonglum da 2-1 ha kawei pat ka jingïakhun ïa ka final ha kane ka juh ka madan.
Ïa ki ar kol na ka bynta ka SS Motsyiar U15 la thep da u Habaniel Marbaniang bad u Lawan Khongjee.“Katba ha ka jingïakhun jong ka Under-17, baroh ar tylli ki kol na ka bynta ka SS Phudmuri la thep da u Ïaisanlang Dohling, katba ïa ka shi kol na ka bynta ka SS Nonglum la thep da u Jerry Malngiang.
Ka SS Motsyiar U15 bad ka SS Phudmuri U17 kum ki Lahduh ki la ïoh rah ïa ka khusnam pisa kaba mar 10,000 tyngka ryngkat ka trophy bad kiba wan baar ka SS Phudmuri U15 bad ka SS Nonglum U17 ki la ïoh mar 5000 tyngka ryngkat ka trophy.
Ha kane ka sngi la sam ruh ïa ki khusnam shimet, ha ka Under-15 ïa ka nam khusnam Player ba kynsai tam (Best Player) la ïoh da u Lawan Khongjee ( SS Motsyiar), Goalkeeper batbit tam (Best Goalkeeper) u Nahun Khongjee (SS Motsyiar) bad ka nam nongthep kol ba bun tam (Top Scorer) ka la leit sha u Renan Warjri (SS Phudmuri).
Katba ha ka Under-17, ka nam Player bakynsai tam ka la leit sha u Ebenezer Nongrang (SS Phudmuri), Goalkeeper ba kynsai tam la ïoh da u Reuben Kurbah (SS Mawlai Kyntonmassar) bad ka nam nongthep kol bun tam ka la leit sha u Iaisan Dohling.
Ïa ka final ha kane ka sngi la wan ban sakhi ryngkat u bah F. Syiem, Chief Engineer District Council, uba dei ruh u player barim ka Mawlai Sports Club (MSC) kum u kongsan, u bah Marcel Kharbani, President ka MSC kum u symbud kongsan, ha kaba la ïa don lang u Bah Hering Shangpliang, rangbah shnong jong ka Mawlai Phudmuri, Nonglum bad kiwei kiwei.
Haba ai jingkren u bah Syiem u la kyntu ïa ki khynnah ba kin pynleit ha ka jingpule bad ha ka jingïalehkai ruh de, khnang ba kin lait na ki jingmlien basniew bad ban ïoh ïa ka met ka phaid ba shait bakhlain.“U ong ruh, ha ka football ha kine ki sngi mynta ki don bun ki lad ki lynti ha kaba ki coach ki lah ban pyntbit ïa ki lada ki trei shitom bad pynleit jingmut.
