M’laya Youth League 2024: Rung semi final ka West Jaintia DSA, Shillong SA, Nongstoin DSA bad ka Ri-Bhoi DSA

Ka resol quarterfinal ha ka Meghalaya Youth League U-14:
Tura District Football Association 0 – 15 Shillong Sports Association
West Jaintia District Sports Association 2(5) – 2(4) Pyndengumiong District Sports Association
Ri-Bhoi District Sports Association 6 – 0 North Garo Hills District Sports Association
Nongstoin District Sports Association 3 – 2 (aet) Amlarem Block Sports Association

Ka resol quarter final ha ka U-16 Meghalaya Youth League:
Williamnagar District Sports Association 0 – 2 Shillong Sports Association
West Jaintia District Sports Association 5 – 0 Pyndengumiong District Sports Association
Ri-Bhoi District Sports Association 5 – 2 North Garo Hills District Sports Association
Nongstoin District Sports Association 3 – 1 Amlarem Block Sports Association

Shillong, Risaw 07: Hadien ki jingïalehkai quarterfinal kiba itynnad bha, la lah ban pynthikna ïa ki kynhun ki ban ïakhun ha kaSemi final jong ka Meghalaya Youth League 2024, ha kaba ka West Jaiñtia District Sports Association, Shillong Sports Association, Nongstoin District Sports Association bad ka Ri-Bhoi District Sports Association ki la jam sha kane ka wat ïakhun ha baroh ar tylli ki kyrdan ïalehkai, U-14 bad U-16.
Hadien ba la pyndep ïa ka wat ïakhun zonal round ha ki madan ïalehkai bapher bapher hapoh ka jylla, ka Meghalaya Youth League, ba la pynlong da ka Meghalaya Football Association ha ryngkat ka jingkyrshan na ka Sorkar jylla Meghalaya, la ïoh ban wanrah ïa ar tylli ki kynhun ba bat kyrdan ba hakhmat na ki Zone ban ïakhun ïa ka Quarter final ha Shillong, ha kaba ka quarterfinal jong ka U-14 la pynlong ha MFA Turf ha Polo, katba ka U-16 la pynïalehkai ha Sports Authority of India, kaba ha NEHU.
La ïoh ban sdang ïa ka quarterfinal naduh ka Sngi Saitjaiñ (05 tarik Risaw, taïew ba ladep), bad la ïoh ban pyndep baroh ki jingïakhun Quarter final ha ka Lah Sngi U Blei.
Kawei pa kawei ka jingïakhun ka ïapher na kawei pat, bad la lah ban sakhi ïa ka sap ba kyrpang ba ki khynnah ïalehkai (na ki synjuk phutbol bapher bapher ha Meghalaya) kiba la ïohlad ban pynpaw pyrthei ïa ka jingtbit jong ki lyngba kane ka lympung.
Ka tie breaker kaba nyngkong ha kane ka lympung ka jia ha ka Sngi Saitjaiñ, ha kaba ka West Jaintia ka la pynkut noh ïa ka lynti ïaid jong ka Pyndengumiong DSA ban jop 5-4 ha ka kyrdan U-14 hadien ba ki la ïakhaid mar 2-2 kol ha ki minit ïalehkai.
Katba ha ka kyrdan U-16, kam shym la don kano kano ka jingeh ïa ka West Jaintia, ha kaba ki la pynjemkhnap haduh 5-0 kol ïa ka Pyndengumiong. U Dangkermi-oo Ryngkhlem u la long u namtam ha kane ka jingïakhun da kaba khyrwit hat-trick. Ka WJDSA ka dei ka lahduh jong ka Zone B katba ka Pyndengumiong ka la wan ba ar na ka Zone D ha baroh ar kyrdan.
Ha kawei pat ka jingïalehkai, ki khynnah lehkai U-14 jong ka Shillong SA ( kyrdan ba ar na ka Zone C), ka la pynpaw ïa ka jingkhlaiñbor jong da kaba pynliem kput haduh 15-0 kol ïa ka Tura District Football Association (lahduh jong ka Zone A), ha kaba u Damebantei Kharkongor u la ïoh ban khyrwit haduh saw kol.
Hynrei ha ka kyrdan ïalehkai ki U-16, ka SSA ka la ïakynduh jingeh shipor shuwa ban ïoh pynkhih 2 kol ban pynliem ïa ka Williamnagar District Sports Association (lahduh jong ka Zone A).
Haba phai sha ka QF ha ka Lah Sngi U Blei, ka lahduh jong ka Zone C, ka Ri-Bhoi ka la pynliem noh ïa ka North Garo Hills DSA ( kyrdan ba ar ha ka Zone A) ha baroh ar tylli ki kyrdan. Ha ka U-14, ka Ri-Bhoi ka la jop suk da 6 kol katba ha ka U-16 ka la mad jingeh khyndiat, ha kaba ka North Garo Hills ka la ïoh ban lamkhmat nyngkong da 2-1 kol ha ka kylla step. Hynrei, ka Ri-Bhoi ka la wanphai da kaba tyngeh ha ka kylla miet bad jop ïa ka jingïakhun da 5-2 kol.
Hadien kine ki jingïalehkai la bud sa ar tylli ki jingïakhun ba ïakhaid bha hapdeng ka Nongstoiñ (ka lahduh ha ka Zone D) bad ka Amlarem Block SA (ka kynhun kaba la wan ba ar ha ka Zone B).
Ha ka kyrdan U-14 ka Nongstoiñ ka la jop da 3-2 kol ha ka extra time hadien ba ïakhaid da mar 2-2 kol ha ka por ba la buh, ha kaba ka namtam la thep da u Shosstar John Sangriang.
Ha ka U-16, la ïoh ban sakhi ïa ka kol kaba stet tam jong ka lympung, hadien ba u Emrickson Khonglah u la thep tang hadien katto katne sekon ba la sdang ïa ka jingïalehkai na bynta ka Amlarem, hynrei ka Nongstoin ka la durut tyngeh ban jop da 3-1 kol.
Ka semifinal kan long ha ka Sngi Balang. Ka U-14, kan long ha Polo, ha kaba ka Shillong kan aireng pyrshah ïa ka West Jaintia ha ka por 10 shiteng mynstep, bud sa ka jingïalehkai hapdeng ka Ri-Bhoi bad ka Nongstoin ha ka por 1 baje mynsngi.
Ka U-16, yn pynlong biang ha SAI, ka Shillong pyrshah ïa ka West Jaintia ha ka por 10 baje mynstep, nangta ka Ri-Bhoi pyrshah ïa ka Nongstoin ha ka por 12 shiteng mynsngi. Ka final yn pynlong ha ka Sngi Thohdieng.