Jowai, Rymphang 03: Ka kynhun ba 9 ngut kiba kynthup ïa ki nongkitkam 4 ngut bad ki dkhot 5 ngut kiba dei na ka seng HITO Jowai Circle kila phah ïa ka shithi iehnohkam bad mihnoh na ka seng sha u President ka HITO sengkmie naduh ka 29 tarik u Kyllalyngkot 2026.
Kine ki nongkitkam bad ki dkhot ki kynthup ïa u Heisar Bareh (General Secretary), u Mewot Passah (Assistant General Secretary), u Lakhon Challam (Finance Secretary), u Pynchngain Kyndiah (Vice President), katba ki dkhot pat ki kynthup ïa u Embhahlang Challam, u Toh-hi-O Lamar, u M. Dkhar, u C. Talang bad u Heibormi Myrten.
Kine ki 9 ngut kila pynpaw ba ka jingmihnoh na ka Seng HITO ka dei tang na ka daw shimet jong ki hi, kam don kano kano ka jingwit jingthut bad ka Seng ne bad ki nongïalam jong ka. Ki la pynpaw ka jingkitbok kitrwiang ïa ka Seng bad ïa ki nongïalam jong ka ba kin nang ïaid shakhmat ha ki kam shakri paidbah.
