Shillong, K’Lyngkot 19 : U Symbud Lamphang (Deputy Speaker) ka Iing Dorbar Thawain ka jylla, u Limison D Sangma u la mihkhmat ïa ka jylla ha ka 86th All India Presiding Officers’ Conference (AIPOC) kaba logn ha Lucknow, Uttar Pradesh. Kane ka jingïakynduh lang kaba lai sngi ka la sdang ha kane ka sngi Nyngkong bad kan kut pat haduh ka 21tarik mynta u bnai hi.
Ïa u Symbud Lamphang la syntan lang da u Secretary ka Iing Dorbar Thawain ka jylla, u Malthus S Sangma. Shwa kane u Malthus u la leit ruh ban shim bynta ha ka 62nd Conference of Secretaries of Legislative Bodies in India, kaba long shi bynta jong katei ka jingkynduh lang haneng.
Ïa kane ka Conference la wan ban plie pyrda da u Lamphang ka Lok Sabha u Om Birla.
Ha kine ki lai sngi jong ka jingïatai, baroh ki Presiding Oficer, ki Secretary jong ka Iing Dorbar Thawain ka Jylla bad kiwei ki nongmihkhmat na kylleng ki bynta jong ka Ri kin ïa syllok halor kiba bun ki phang kiba ïadei bad ka rukom pynïaid beit pynïaid ryntih ïa ki kam kiba ïadei bad ka Iing Dorbar Thawain jong ki jylla.
Kane ka Conference ka long ruh ban ïatai halor kiba bun ki phang khamtam kum ka jingpyntreikam ïa ki kor technology na ka bynta ka jingtreikam kaba shai, kaba ryntih bad ka rukom thaw ain da kaba pynshong nongrim katkum ka jingdonkam ki nongshong shnong ka jylla. Nangta kane ka long ruh shi bynta ban ai jinghikai pyntbit shuh shuh ïa ki nongmihkhmat ba kin lah bn pyntbit ïalade ha kaba ïadei bad ka jingpynkhlain shuh shuh ïa ka synshar paidbah bad khamtam eh ban pyntikna ïa ka jingdon jingkitkhlieh jong ka Iing Dorbar Thawain haba ïadei bad ki paidbah.
Ïa kane ka jingkynduh lang yn wan ban pynhap pyrda ha ka 21tarik mynta u bnai da u Lamphang ka Lok Sabha hi, u Om Birla.
