Mawkyrwat, ‘Naitung 05: Ka jinglong jingman jong ka Health Sub Centre kaba don ha Umsih (Puksora), South West Khasi Hills District ka la long kaba sangsot haduh katta katta hadien ba la lap ba ka don ka jingpei kaba la pynmih ruh ïa ka um ha kane ka Sub Centre.
Kaba kham pynlyngngoh shuh shuh ka long ba ym dei tang ka jingtei barim kaba jaw um hynrei wat ka building thymmai ruh ka jaw um bad ki jingkhang ruh kim da long bha ban khang.
Kumta, kane ka jingpei um jong ka Health Sub Centre ym tang ba ka pynlong ïa ki nongtrei (staff) ba kim biang shuh haba ki wan trei bad sah ha kane ka jaka hynrei ka la pynwit bad ktah ruh wat ïa ka jingtreikam pura jong kane ka Health Sub Centre.
Ha ka jingleit jurip jong ka KSU Ranikor Circle ka la lap ïa ki jingshisha bad ka seng ka kyntu jur ïa ka Engineering Wing jong ka Health Department bad ruh ïa u District Medical & Health Officer (DM&HO) jong ka South West Khasi Hills District ban phah peit bad phah maramot mardor khnang ba kan nym buh jingeh ïa ki nongtrei badei ban sah ha katei ka jaka bad khamtam eh ïa ki nongwan shim dawai na kane ka jaka sumar ne ka Health Sub Centre kaba don ha Umsih (Puksora).
