Nongstoiñ, K’lyngkot, 18: Ka Bishop House New Nongstoiñ West Khasi Hills, ka la kyntait ban ai jingithuh ïa ka ‘Jingpynkyntang Lyngdoh’, kaba la jia long ha ka shnong Langñiuh, Eastern West Khasi Hills ha kine ki sngi ba la dep, da kaba ong ruh ba u to u ba phrung dur kum u Bishop ba pynkyntang, um dei satia u Bishop jong ka Balang Catholic.
Katkum ka kyrwoh na u Rev Fr Anselm Nonglang, Diocesan Administrator ka Nongstoiñ Diocese, la ong ba ki don ki riew shim kabu kiba kam ïalade kum ki Bishop bad ki la leit ban pynkyntang Lyngdoh ha kane ka Shnong. Hynrei u la ong ba ka Balang Katholik hi kam don jingtip eiei halor kane ka jingpynkyntang.
Ha u kyrwoh khubor u la ong, “Ka long kaba sngewsih ban tip ba ha kine ki sngi, ki la don ki dak jong ka, ‘jingïaleh pyrshah ïa ka Jingngeit Katholik’, da ki katto katne ki Khun Khristan Katholik ha kane ka Jylla Niam Nongstoiñ. Ka Jylla Niam Nongstoiñ ka pynrem jur halor kine ki jingjia ba shyrkhei ban pyrshah jingngeit Katholik. Khamtam da kito kiba shu leh mynleh bad kiba kam ïalade ba ki dei ki Bishop bad kiba la shim kabu ban pynkyntang Lyngdoh, kumba leh ha ka Balang Katholik jong ngi”.
“Ka Balang Katholik Nongstoiñ kam don jingtip ei ei shaphang kata ka ‘Jingpynkyntang Lyngdoh’ hapoh ka Shnong Langñiuh (ka shnong ba don marjan bad ka Mawtikhar bad Rikhen). U to u ba pyrshang leh bad phrung dur kum u Bishop, um dei u Bishop jong ka Balang Katholik”, u la bynrap shuh shuh.
Katkum ka jingong jong u, katei ka jingjia ka dei ka jingïaleh pyrshah ïa ka Balang Katholik ha kaba u la bynrap ruh, “Ka Aiñ jong ka Balang Katholik Canon Law, Can 751, ka batai shai, ba ngi ïaleh pyrshah ïa ka Jingngeit ha ki lai rukom. Kaba nyngkong lane ka Herese, ka dei ka jingkyntait khang lane ka jingartatien khnang ïa ka jingshisha ba ngi dei ban ngeit. Kaba ar lane Apostacy, ka dei ka jingieh noh pura ïa ka jingngeit Khristan. Kaba lai lane Schism, ka jingkyntait ban snoh ha ka bor pynïaid jong u Kpa Bakhuid lane ka jingïalong kawei ki paid ‘Riewngeit’ kiba shah synshar ha u.
U Rev Fr Anselm Nonglang, u la kyntu ïa ki para ba ngeit ba kin long kiba husïar ïa ki ‘Nongïalam Bakla’ khamtam kito wan ‘Kum ki Suri Kup Snieh Langbrot’.
