Jowai, Jylliew 25: Ki katto katne ngut ki nongtrei bylla hapoh Ri-Lum Jaiñtia kila mih shakhmat mynta ka sngi ban sdang thymmai da kawei ka seng kaba la tip ka ALL JAINTIA LABOUR UNION (Organise and Unorganise Labour) ïa kaba la dep ban leh ruh ban register hapoh ka Meghalaya Societies Registration Act 1983 ha ka office u Joint Registrar of Society ha Jowai, West Jaiñtia Hills District bad kane ka Union kan trei kam ha baroh ki jaka ka Ri Lum Jaiñtia (East bad West Jaiñtia Hills District.
Haba phai khyndiat shaphang ka jingthmu haba seng ïa kane ka union, ki don shibun ki jingthmu, hynrei kiba kongsan eh ka long ban peit ïa ka jingeh jong ki briew kiba im ja kpoh, pyndap pynbiang ïa baroh ki jingdonkam ka ïing ka sem tang da kaba bylla sngi. Kawei pat ka bynta ka long halor ka jingïoh laitlan palat ki briew kiba nabar ban wan rung bad trei shapoh ka District kaba la pynlong ïa ki briew jong ngi ban shem jingeh ban ïoh jaka bylla.
Haba kren ïa kane ngi sngewthuh ba kino kino ki don ka hok ban wan trei shane, hynrei ngi kwah ba kin wan da ka lynti kaba dei namar don ki kyndon kiba ka sorkar hi ka la buh ban regulate ïa ka labour influx ban lait na ka illegal immigration ki labour shapoh District bad khamtam ban teh lakam ïa ka jingïoh lad ki briew na kiwei pat ki ri ka pyrthei ban rung shapoh ka Ri Lum Jaiñtia bad ka jylla hi baroh kawei.
La ïathuh ki don shibun bah ki kam kiba ka union kala dep ban peit bad kiba donkam ban leh eiei khnang ba kan wanrah jingmyntoi ïa ki nongtrei bylla (tribal & non-tribal) ha baroh ki liang.
Nalor kine ka Union kala don ka jingthrang jingangnud ban pynsngewthuh ïa ki labour halor ka jingdonkam ban leh khuid khnang ïoh ka ka jingkoit jingkhiah, ka jingkhuid ban pynkhiah ïa ka Mariang da kaba sumar ïa ki sawdon sawkun ka Mariang bad kiwei kwei.
Da kane ka khubor ka Union ka khot I Broh ki nongtrei bylla (Organised & Unorganised Labour) ba kin wan ïa kynduh ïa ki nongkitkam ka union haba don kano kano ka jingeh khnang ba ka Union kan ïoh tip ban ïarap bad pynsngew ruh ïa ka jingeh sha ki bor ba dei peit.
Ki nongkitkam ka Union ki long kumne, President ma Kyrmen Siangshai, Vice-President ma Chandame Sungoh, General Secretary ma Shaphrang Pajuh, Joint Secretary ma Lewaphi Sutnga, Finance Secretary ma Miju Sutnga, Member ma Kwel Lakiang, Adviser ma Pramod Jain, lem bad kiwei ki dkhot. Kane ka long katkum ka khubor na u General Secretary ma S. Pajuh.
