Mih shakhmat ban ïakhun pyrshah ïa u drok, wer ka MLA Sutnga-Saipung ïa ki paidbah

Khliehriat, Jylliew, 26: Ka ophis District Social Welfare Officer (DSWO), East Jaiñtia Hills District ryngkat ka jingïatreilang bad ka ophis Deputy Commissioner, East Jaiñtia Hills District bad ka Hima Sutnga Youth Federation (HSYF), ha ka sngi Palei ki la rakhe ïa ka International Day Against Drug Abuse and Illicit Trafficking da kaba pynlong ïa ka jingai jingpynshai ha kaba ïadei bad ka jingshyrkhei jong u drok.
Ka MLA jong ka Sutnga-Saipung Constituency ka Kong Santa Mary Shylla kaba dei ruh ka Chairperson jong ka Committee on Empowerment of Women jong ka Meghalaya Legislative Assembly haba kren kum ka kongsan ka la ong ba kane ka mat ka la buh jingeh ym tang ïa ka jylla hynrei ha ka ri hi baroh kawei.
Ka la ong ruh ba ka jingïatreilang jong ki tnat Sorkar bapher bapher lem bad ka tnat Pulit kaba ju trei shitom man ka por kan lah ban ïarap shibun ban ïakhun pyrshah ïa u drok
“Ka long kaba donkam ban pynlong ïa kum kine ki prokram ai pynshai ha ki jaka bapher bapher hapoh ka district bad ka la kyntu jur ïa ki paidbah nongshong shnong, ki nongsynshar shnong ba kin wan sha kiba kum kine ki prokram ai jingpynshai ban ïa shimbynta lang ruh ha kane ka thma pyrshah ïa u drok” ong ka kongsan bad bynrap ruh ba u drok u ktah ym tang ïa ka koit ka khiah jong kiba pyndonkam drok hynrei u ktah ruh ïa ka longïing baroh kawei bad ïa ka imlang ka sahlang, ka kyntu ruh ba ym dei pat ban peit ibeiñ ïa kiba pyndonkam drok.
Haba kren sha ki khynnah skul kiba la ïa don lang ha kane ka prokram, ka kongsan ka la kyntu jur ïa ki khynnah ba ki dei ban ong EM ïa u Drok.
U Deputy Commissioner ka East Jaiñtia Hills District, u Shivansh Awasthi, u la ong ba ka sorkar Meghalaya hapoh ka jingïalam u myntri rangbah u Conrad K Sangma u la pynbna paidbah ïa ka DREAM Mission, kaba dei ka mission kaba ïar bha ha kaba ïadei bad ka thma ïakhun pyrshah ïa u drok ba kynthup ruh ki prokram ai jingpynshai bad ka jingthmu ban shna noh ïa ki Rehabilitation Centre.
“Ki bor synshar district jong ka East Jaiñtia Hills District ka la ïaleh katba lah ha kaba ïadei bad ka jingïakhun pyrshah ïa u drok da kaba pynlong ïa ki Winter Camps ha ki khatsan tylli ki skul kiba don hapoh ka district ha kaba ki la don haduh 2500 ngut ki khynnah skul ki la mih shakhmat bad kren ïa ka mat ba ïadei bad ka jingshyrkhei u drok bad kane ka Winter Camp ka la ïarap ruh ha kaba pynkhlaiñ ïa ka bor jingmut jingpyrkhat jong ki khynnah da kaba ki la lah ban ïa shim bynta ha kiba bun ki bynta kiba ïadei bad ki sap ki phong ba ki don” ong u Awasthi.
Shuh shuh, u Deputy Commissioner u la pynpaw ruh ba ka jingdon ïa ki madan Futsal ha ki shnong bapher bapher hapoh ka district ba la bei tyngka lyngba ka Ditrict Mineral Funding (DMF) kane ruh ka long shibynta ban ïarap ïa ki khynnah bad ki samla ba kin lait na u drok ha kaba ki khynnah bad ki samla ki lah ban pynlut ïa ka por jong ki ha kaba ïalehkai ha ki madan Futsal.
U la kyntu ruh ïa ki tnat treikam bapher bapher jong ka sorkar kynthup ruh ki nongsynshar shnong, ki seng samla, ki sengbhalang, ki nonghikai, ki khynnah skul ba kin don ka jingïatreilang ban ïakhun pyrshah ïa u drok.
Ha kane ka prokram la don ruh ka jingshim ïa ki kyntien jingkular ne ka pledge ban wanrah ïa ka imlang ka sahlang kaba lait na u drok ba la ïalam ïa kane da u Superintendent of Police, East Jaiñtïa Hills District, u Giri Prasad, IPS.
Ka la don ruh ka jingpynkup burom ïa ka Programme Manager, MCSWA, ka kong Renibet Patlong lem bad ka kynhun kumjuh ruh ïa u Medical Officer, in-charge Opioid Substitution Therapy (OST), East Jaiñtia Hills District, u Dr J. Nongtdu lem bad ka kynhun kiba la trei shitom met bad mynsiem ha kaba ïadei bad ka thma ïakhun pyrshah ïa u drok.
Ha ki kynta ba pynlong ïa ka Session, u Additional Superintendent of Police, East Jaiñtia Hills District, u S. Pasleiñ u la pynshai paidbah halor ki aiñ bad ki kyndon jong ka Narcotic Drugs bad ka Psychotropic Substances (NDPS) Act, 1985 bad u Medical Officer, in-charge Opioid Substitution Therapy (OST), East Jaiñtia Hills District, u Dr J. Nongtdu u la ai ka jingkren halor ka jingktah bad kaba mih na kaba dih drok bad ka Programme Manager, MCSWA, ka kong R. Patlong ka la kren bad pynshai halor ka jingshyrkhei ka jingpang HIV/ AIDS bad ka jingshyrkhei u drok.
Kiba la ai jingkren ki kynthup ruh ka District Social Welfare Officer (DSWO), East Jaiñtia Hills District, ka kong Rica Bareh bad u President, Hima Sutnga Youth Federation (HSYF),u bah Nangbah Nongtdu.
Ka la don ruh ka jingpyni ïa ka skit ba lyngkot na ka Mega Fun bad Syrleiñ Secondary School, Jalaphet, la ïoh ruh ïa ka jingrwai na ki khynnah skul jong ka Syrleiñ Secondary School, Jalaphet.
Ha kane ka prokram la sam ruh ïa ki prize sha kito kiba jop ha ka jingiakhun pyni ïa ki Reels bad Hashtag ha kaba u samla Hame Salahe u la ïoh ba nyngkong, u Pynyoomiki Dkhar u la ïoh ba ar bad u Diego.S.Suchen u la long ba lai.