Mih sa ki Rangbah Shnong ka Sor Shillong ban ïakhun ïa ka jingjyllei u drok ha ki shnong

Shillong, Risaw 17 : Ka tnad Elaka jong ka Khasi Hills Autonomous District Council ha ka sngi Nyngkong ka la khot ïa ka jingïalang ïa baroh ki Rangbah Shnong sor Shillong ban ïakren bad ïatai sani halor ka jingkynrei palat u drok bad kumjuh ruh ki nongkhaii drok ha man la ki shnong.
Haba kren bad ki lad pathai khubor hadien ka jingïatai kaba la neh kumba lai kynta ei ei bad ki Khlieh Nongsynshar, u Deputy CEM ba peit ïa ka Elaka, Bah Pynshngaiñ N Syiem u la ïathuh ba ka jingïalang ki la ïatai sani bha ba da kumno kin lah ban pynduna ïa ka jingjyllei u drok bad ka jingbun kiba ngop ha ki shangkhawiah jong utei u jingdih ba shyrkhei.
“Nalor ki mat ba la kren ha kane ka sngi ngi la kyntu ruh ïa ki Rangbah Shnong lada ki dang don shuh ki jingmut ba kin phah biang hapoh ka shi taiew sha ka Council,” bynrap biang u Deputy CEM.
U la ïathuh ruh ba hadien ba u Lat u la ai ka jingmynjur ïa ka KHAD (Administration of Elaka) Amendment Bill, 2023 kaba mynta ka la long aiñ, na ka liang ka Council mynta ka pynkhreh ban thaw ïa ki Rules .
Katkum ka jingong jong u hapoh kane ka ain kin don ruh ki Vigilance Committee lane ka kynhun kaban peitngor kaban treilang bad ki bor ka ain la ka long haba kaban ïa khun pyrshah ïa u drok la ka long ïa ki nongkhaii lane ïa ki nongdih ruh.
U Deputy CEM u ong ruh ba kane ka ain kaba dang shu ïoh ïa ka jingmynjur kan pynkup bor ruh ïa ki seng longkmie bad ki seng samla ba kin lah ban trei kham bha shuh shuh na ka bynta ka bha ka miat ha ki shnong ki thaw da kaba trei ryngkat ryngkat bad ki bor ka aiñ.
La ïathuh ruh ba ha kane ka jingïalang ki la ïa kren halor ka khuid ka suba ha ki shnong ki thaw bad ruh halor ka ishu kaba ïadei bad ka jingpynkylla thymmai ïa ka Khyrnit kaba Hynriew jong ka Riti Synshar jong ka Ri.
Ha kajuh ka por u la ong ruh ba ka Council kan sa khot ïa ki Rangbah Shnong ba don ha kito ki shnong ba jur u drok khnang ba kin lah ban kham sani shuh shuh.
Da kaba kubur ba ka Council kam don ïa ka bor ban ïakhun ïa u drok hynrei ki don pat ïa ka bynta kaba khraw bad ki shnong na ka bynta ban wanrah ïa ka shongsuk shongsaiñ ha ki shnong ki thaw.
La wan ruh ban shim bynta lang ha kane ka jingïalang naduh ki Nongïalam jong ka Synjuk ki Nongsynshar Shnong ka Bri u Hynñiewtrep.