Mih sa ki khun ki hajar ka Hima Langrin ban ïada ïa u Syiem

Shillong, Naitung 12: Hadien ka jingmih ka Seng Samla Hima Langrin ban ther ïa ka jingtreikam u Syiem ka Hima Langrin, u Pa’iem Nangtei Syiemïong, mynta pat sa shi kynhun ki Samla kiba la kam ba kidei ki Khun ki Hajar ka Hima Langrin ban pynksan bad ïada ïa ka jingtreikam jong u.
Kane ka kynhun ki Samla bad ki rangbah hapoh ka jingïalam u Bah Enbok Nonglang bad u Christopher Lyngdoh, haba ïakren bad ki nongthoh khubor mynta ka sngi ha Shillong Press Club, kine ki nongïalam ki la ong ba ki jingkynnoh jong ka Seng Samla Hima Langrin ki long ki bym shong nongrim, namar ba ka Management Board kam dei kaba synshar ne pynïaid ïa ki kam jong ka Hima, hynrei kadei kaba shu peit tang ïa ki artylli ki jaka. “Ka Management Board kam dei satia ka bor synshar ha ka Hima”, la ong u Samla Enboklang Nonglang.
U la ong ruh kane ka Board kadei kaba la thaw ha ka snem 2011 hadien ba la poi sha ka jingïasuk hapdeng ka Hima bad ka ïing ka sem jong u Syiem ka Hima, da kaba rai ba ka jingmih na kine ki artylli ki jaka ka long ban ïasam marbiang hapdeng ka Hima bad ka ïing ka sem jong u Syiem. “Ngi la don hapdeng ka jingsuk ha kine ki snem haduh mynta, balei ngin pynkhih bad pynkulmar biang”, la ong u Samla Christopher Lyngdoh.
Ha kaba ïadei bad ka jingai jingïarap ïa ki Balang kam ei tang 77 lak kumba la kynnoh ka Seng Samla, hynrei la ai jingïarap 1.44 klur sha ki 36 tylli ki Balang bapher bapher kiba don ha Hima Langrin, ha kaba la ai mar 4 lak tyngka. Nangta la ai ruh 73 lak tyngka sha ka jingtrei mishon jong ki Balang shabar jong ka Hima. Kine ki Samla ki la ong ba ka jingai ruh kam dei kaba la shu leh tang da u Syiem marwei, hynrei kadei kaba la ïamynjur lang bad ka Dorbar Hima.
Shuh shuh ki Samla ki la ong ba ïa ka Management Board la thaw naduh u 2011 bad u Syiem Nangtei u la shah jied kum u Syiem ba pura ha ka snem 2026. Ki la ong ba lada ki paidbah kim mon ïa kata ka Management Board te kin nym la jied ïa u Bah Nangrei kum u Syiem jong ka Hima.