Mih sa ka Ri Bhoi Peoples’ Council ha Ri Bhoi, rai ban pyrshah ïa ka lynti rel bad dawa pyntreikam ïa ka ILP ha ka jylla

Nongpoh, Naitung 17: Ban phai khmat kyrpang na ka bynta ban shakri ïa ka bha ka miat bad ka roi ka par ki paidbah ka them Ri Bhoi ha kaba dang don shibun ki mat ki jura ba dang donkam ban trei na ka bynta ban kyntiew ïa kane ka District, ka kynhun jong ki samla na Ri Bhoi ha ka jingïalam u Samla Jason Lennox Nongrum mynta ka sngi ki la suit la shor da kawei ka seng ba thymmai, ha kaba la ai kyrteng ka Ri Bhoi peoples’ Council (RBPC).
Haba suit ba shor ne pynbna paidbah ba la seng ïa kane ka seng ba thymmai la pynlong ha Parish Hall Nongpoh, kaba dei ruh ka sngi kaba ngi la rakhe ban kynmaw burom ïa ka sngi ïap ba 188 snem jong U Syiem Tirot Sing Syiem, uwei na u khla wait ka jaid byrniew ba kane ka seng ka la leh burom da kaba buh syntiew kum ka jingai burom ïa ki kambah ba une u Syiem ka jaid bynriew uba la len lade ïa la ka jingim na ka bynta ban pynioh ïa ka jinglaitluid na ka jingsynshar donbor ki Phareng ne ki Dohlieh na shiliang duriaw.
Ha kane ka sngi ba la pynbna paidbah ba la dep ban seng thymmai ïa kane ka seng la sakhi lang ruh da ka jingdon lang ki riew rangbah ka Ri Bhoi, ba kynthup ïa u Bah R.R Kynsai Makdoh, CEM barim ka KHADC, u Bah Pluster Syiem, uwei na heh ophisar pulit barim ka jylla, u Bah Najim Kharmalki, u nongmihkhmat na ka Ri Bhoi Dorbar bad na ka Western Ri Bhoi Dorbar, u Bah Augustine Wahlang lem bad ki spah ngut ki dkhot kiba la wan ban pynïasoh na ka bynta ban long kum ki shipai ka jaid bynriew ha ka lama jong kane ka Seng Ri Bhoi Peoples’ Council.
Lyngba jong kane ka sngi, la pynlait paidbah ruh ïa ka shap (Logo) bad kumjuh ruh ka kyntien phira, ‘Tylli Lang, Ngin Tur shaphrang’ ba la pynlait da u Bah R.R Kynsai Makdoh.
Haba ai jingkren ha kane ka sngi ku u Convener kane ka seng bad u ban sa shimti ruh kum u President, u Samla Jason Lennox Nongrum, u la ong ba ha ka jingshisha la bun tylli ki seng bhalang kiba la don ha kane ka District bad ha ka jylla, hynrei ka daw kaba la pynlong ban seng ïa kane ka seng, ka dei halor ka nongrim ba dang don shibun ki mat ki jura ba kum ki samla ka District ki hap ban trei na ka bynta ka jingdonkam ban kyntiew ïa kane ka District.
Kum ka ka jingmait phang halor ki mat ba kongsan ba kane ka seng ka angnud ban trei ha Ri Bhoi District, u Bah Jason Lennox Nongrum, u la ong ba dang don shibun ki bynta ba kum ki samla ki hap ban don ïa kata ka jingkitkhlieh da kaba jer kyrteng ruh kum ka jingïakhun ban pynduhjaid ïa ka jingkynrei u drok, ka jingdonkam ban dawa na ka sorkar ban pynbiang ïa ki lad ai jingsumar ba paka ha Ri Bhoi, ka ioh kam ioh jam ki samla bad kumjuh ruh kiwei kiwei ki kam kiba long na ka bynta ka jingbit jingbiang ki paidbah hapoh ka them Ri Bhoi.
Shuh shuh, u la kren ruh halor kiwei ki mat kiba kynthup ban kyrshan pura na ka bynta ban pyntreikam noh ïa ka la Inner lIne Permit bad ka jingpyrshah ïa ka Railway ba la lamkhmat da ka Khasi Student Union, katba ka sorkar kam pat lah ban buh ïa kita ki kyndon kiba tehlakam na ka jingwan rung kynthep ki bar jylla kaba la buh jingma ïa kane ka jylla ba don ki jaid bynriew Khasi ba tang shi troh.
U la kren ruh halor ki kam pud ki kam sam ba ha kane ka jingïapynbeit pud ha ka wat kaba ar, ka sorkar Meghalaya kam dei ban shul eh matlah, hynrei shuwa ban shim ïa ka rai ka dei ban da bishar bniah bin pa bin khnang kane ka kam pynbeit pud ka long kaba ai jingmyntoi ïa ki paidbah ha khapppud, ha kaba lah ban ong ba bun na ki nongshong shnong ha khappud khamtam ha Ri Bhoi ki kwah ban don sha ka jylla Meghalaya bad ban shu leh kumba la leh ha ka wat kaba nyngkong khlem da tih bniah ne wat ïa ki sakhi satar kiba biang lyngba ki kot ki sla ne a jinglong trai ha ka khyndew ka shyiap.
Shuh shuh, u la ong ruh ba dang don shibun ki kam kiba kum ki samla ki hap ban shim ïa kata ka jingkitkhlieh na ka bynta ka bit ka biang ki paidbah ha kane ka District, hynrei ïa mynta ka seng kan shu pynpaw tang ïa ki katto katne ki mat ki jura ha kaba nangne shakhmat ka seng kan sa dang bundien bad kum ka seng ruh kan nym long kata ka seng kaba shu seng tang ban mytoi shimet, hynrei kan trei borbah na ka bynta ka daw bah jong ka jaid bynriew khamtam na ka bynta ki paidbah ka dong bad ka thaiñ Ri Bhoi, u la bynrap.
Kiwei kiwei kiba la ai jingkren ha kane ka sngi ki kynthup naduh u Bah R.R Kynsai Makdoh, u Bah Najim Kharmalki, u Bah Augustine Wahlang, ha kaba kum ki riew rangbah ruh ki la la pynpaw ïa ka jingsngewkmen ban don kita ki samla kiba kloi ba shim ïa ka jingkitkhlieh ban tei ka ka bha ka miat jong ka dong Ri Bhoi bad kum ki riew rangbah ki kloi ban ai jingkyrshan lada kane ka seng ka trei shisha na ka bytna ka daw bah jong ka dong bad ka thaiñ Ri Bhoi.