Nongpoh, Naitung 31: Sa kawei pat ka sengbhalang ka New Dawn Meghalaya, Ri-Bhoi District Unit mynta ka sngi kala mih shakhmat ban tuklar halor ka jinglip bording khah khah ha ka thaiñ Nongpoh, hadien ba bun naki paidbah kila ujor halor ka jingthud palat ka bording elektrik kaba la wanrah ka jingeh kaba khraw ïaki samla pule, ki nongseng kam seng jam bad kiwei kiwei ki jingdonkam jong ki paidbah.
Naka liang ka seng hapoh ka jingïalam jong u Samla Ulrich J Mawlong kum u President bad u samla Favorable Sylliang General Secretary ki la leit ban ïa kynduh ïa u SDO ka MePDCL, Nongpoh ban ïakren halor ki jing synjor jong ki post elektrik haki ba bun ki jaka bad ban wat jingtip na kaei ka daw kaba la pynlong ïa ka bording ban lip khah khah haki thaiñ Nongpoh bad kiwei kiwei ki jaka ka thaiñ Ri-Bhoi.
Haba kren sha ki lad pathai khubor hadien katei ka jingïakynduh, u samla Ulrich u la ïathuh ba u SDO u la aidaw ba ka jingsynjor jong kiba bun ki post elektrik kiba don ruh kiba la jan khyllem ka dei namar ba duna palat ki post elektrik kiba thymmai ha kane ka tnad bad hap ban pyndonkam shuwa da kiba rim katba ym pat poi thymmai.
Shuh shuh u Samla Ulrich u la ïathuh katkum ka jingïoh lum jingtip na u SDO, kadaw bah kaba pynlong ïaka jinglip bording khah khah ha ki thaiñ Nongpoh ka dei namar ba ki jingduna palat ki nongtrei hapoh kane ka tnad treikam.
U la ïathuh ruh ba naka liang u SDO u la ïathuh ïaki ba kane ka jingwan jong ka bording elektrik ha Nongpoh ka hap ban ïaid lyngba ki ba bun ki jaka kaba kynthup naduh na Umïam, Umsning, Zero Point, Jyntru bad kan sa poi pat ha Nongpoh. Lada don kano kano ka jingthud haka bording electrik na kitei ki jaka kaba mut kan ktah ruh ïaka jingthud jong ka bording electrik ha ki thaiñ Nongpoh.
