Nongpoh, Nailar 20: Tang hadien katto katne por ba la la don ki kynhun seng bad ki synjuk kiba la pynmih ban pyrshah ïa ka jingthmu ban wan rah ïa ka ktem khalai (Casino) ha Ri Bhoi, ka HNYF Northern Region mynta ka sngi ruh ka la kyrshan halor kane ka jingpyrshah ban wan rah Casino ha Ri Bhoi bad ka la rai ruh ban pyrshah jur lada wan rah jubor ïa kane ka jaka Khalai ba la tip ha ka ktien Nongwei kum kata ka ‘Casino’.
Kum ban pynkynmaw, halor kane ka jingthmu ban wan rah ïa ka Casino ha Ri Bhoi, dang shen ka KSU North Khasi Hills District Unit bad ka Synjuk ki Rangbah Shnong Ri Bhoi District ruh lyngba ki lad pathai khubor ki la dep ban pynmih ïa ka jingpyrshah bad ki la dawa jur ruh na ka sorkar jylla ba kam dei ban ailad ban wan rah kum kine ki jaka khalai kiba la pyrshah lypa da ki paidbah.
Haba ïa kren mynta ka sngi bad ki lad pathai khubor ha Nongpoh, u President ka HNYF Northern Region, u Bah Marcus Marten, u la kren shai ba ka seng HNYF kan pyrshah jur ïa kane ka Casino bad horkit hordang ka seng kan nym pdiang ban don kum kane ka ktem khalai ha Ri Bhoi District.
U la ong ruh ba ka sorkar jylla lada ka kwah ban wan rah ïa ka shongsuk shongsain ha ka jylal ka dei ban pynsangeh shi syndon ïa kane ka jingthmu ban wan rah Casino ha Ri Bhoi bad kum ka seng da leilei kan nym lah ban pdaing bad lada ka sorkar jylla ka leh da ka bor kum ka seng ruh kam banse ban pyni daka bor ban pyrshah halor kane ka ktem khalai kaba ktah ïaka burom bad ka ijot jong ka jylla.
Shuh shuh, u la kren shai ruh da kaba ong ba lada ka sorkar hi kan pynïaid ïa kane ka Casino lane ai bor ïa kito kiba thmu ban pynïaid ïa kane ka ktem khalai ka hap ban shim ïa ka jingkitkhlieh lada mih kano kano ka jingjia ba sngewsih bad kum ka seng kam salia ban mih ban pyrshah bad wat lada dei ban leit khang tala lada ka sorkar ka thmu ban pynïaid da ka bor ïa kane ka ktem khalai, u la bynrap.
