Mih ryntih ki paidbah ka shnong Umbuda ban pynkhuid pynitynnad ïa ka shnong
Ka khuid ka suba ka dei ban long ka dustur
Nongpoh, Naiwieng 08: Ban wanrah ïa ka khuid ka suba bad ban pynmlien ïa ki nongshong shnong ba kin long kiba adkar ha ka jingim bad ka jingkhuid, ka long kawei na ki kam kaba kongsan tam ha ka jingim briew bad ka dei ruh ka kamram jong uwei pa uwei u nongshnong, kumba la hikai da ki tymmen ki san mynshwa ban bud ryntih.
Ha kane ka sngi, ka Dorbar Shnong Umbuda ka la pynlong ïa ka jingpynkhuid shnong kaba long shi sien shi snem, ha kaba ki paidbah nongshong shnong ki la mih ryntih na la ki ïing ban rah la ki tiar ki tar bad shim bynta shitrhem ban pynlong ïa katei ka sngi ka dei ka sngi kaba kmen ryngkat ka jingtylli ban wanrah ka khuid ka suba.
Ha shwa ban sdang ïa katei ka jingpynkhuid, u MLA ka Nongpoh Constituency, Bah Mayral Born Syiem, u la long kum u kongsan haka jingsakhi lang ruh da u Rangbah Shnong Umbuda Bah C.B. Syiem, ki dkhot ka Dorbar Shnong, ki Seng Longkmie, lem bad ki samla kynthei bad shynrang kiba la wan ban ai mynsiem lang.
Ha ka jingkren jong u Bah Mayral Born Syiem, u la kyntu ïa ki paidbah ba kum ki nongshong shnong, kin long kiba iaid ryngkat bad ki nongïalam shnong bad kin bud ryntih ïa ki kyndon aiñ jong ka Dorbar Shnong. U ong ruh ba ka jingpynlong ïa kum kine ki jingpynkhuid ka pyni ba ki paidbah ki don ka jingkitkhlieh ban ïatreilang ban pynlong ïa ka shnong kaba khuid bad kaba suba.
Nalor kata, u MLA u la pynsngew ruh ïa ki mat treikam kiba u la dep ban wanrah ha katei ka shnong, bad u la kular ba un nang iai trei ban pyndep ïa ki jingangnud bad ki jingdonkam jong ka Shnong Umbuda, khamtam ha kaba ïadei bad ka jingpynioh ïa ka Iing kaba paka jong ka Seng Kynthei, khnang ba kin lah ban ïoh ka jaka kaba biang ban trei ïa ki kam na ka bynta ka bha ka miat jong ka shnong ka thaw.