Mih paidbah ki nong Pynurkba bad pynrem jur ïa ka jingwan kam pud ki shnong Bataw

Khliehriat, Naitung 28 : Ki paidbah nongshongshnong jong ka shnong Pynurkba East Jaiñtia Hills District hapoh ka jingïalam u Waheh Shnong u bah Syrdeplang Ryngkhlem mynta ka sngi ki la ïa mih paidbah bad pynrem jur ïa ka jingwan kam pud ka shnong Bataw ïa kawei ka khlaw shnong.
Haba kren sha ki pathai khubor u Waheh Shnong Pynurkba, u bah Syrdeplang Ryngkhlem, u ong ba kum ka shnong hi baroh kawei ka pynpaw ka jingsngewsih ba naduh ka 24 tarik mynta u bnai naitung ki nongshong shnong jong ka shnong Bataw ki la wan hapoh u pud u sam jong ka shnong bad ki pynjulor ïa ki khlaw kiba dang hap hapoh shong Pynurkba bad ki la wan ban kam ruh ba dei u pud u sam jong ki, ki la prat ïa ki khlaw, ki la tih nala na ka khyndew bad ïa uwei u briew uba na shnong Pynurkba uba dang tih maw ruh ki la kylli ki la tohkit haduh ba u la tieng haduh ba um tip shuh ban jubab “Nga pynpaw ba nga sngewsih halor kane ka jingwan tih jcb ki nongshong shnong ka Bataw, ki la tep khyndew ruh ïa ka wah duid, ka surok ba ju iaid ki nongshongshnong Pynurkba” ong u Waheh Shnong bad bynrap ruh ba ki la ioh ka jingthoh ba register ïa ka jaka lyngba ka jingjurip ka elaka ha kato ka por namar lada khlem jurip ka elaka ka District Council kan nym lah ban register ïa ka kot jaka bad 2023 ki la ioh ïa ka kot jaka
“Nalor ba ngi la ioh ïa ki kot ki sla ki dang nud dang hun ban leh kumne, ka jingialeh ka dei kaba la slem bha kaba naduh u snem 2008 haduh 2019 ka la iap ka kot jong ki nong Bataw ha kaba la pyniap ïa ki kot ki sla da ki briew ka elaka, ki Doloi la wan ki briew sorkar ruh ha kaba ka la don ka jingiakren hynrei myn ha ka 24 tarik ki la wan ban leh donbor, ngi ngim kwah ban shu leh rieh ne leh tuh hynrei la soiïa ka kot da u Doloi ka jingiaid lynti ruh kaba jngai haduh ba ngi ioh ïa kane ka kot, ngi pynrem jur ïa ki nong Bataw naduh ka Liar Umsawe ter ter sha Liar Umsapit shaduh Umdot, Umkrem haduh Umswe haduh Wah Prang ka dang dei hapoh u pud u sam jong ngi, te lada ka Bataw ka leh donbor kumne te ngim tip shuh kumno ban ïakren ha kaba ma ki hi kiba la wan leh bor ym dei ka shnong Pynurkba, naduh mynta ka shnong Bataw ka dei ban tip ba kine ki dei hapoh ka shnong jong ngi ym dei ban wan pynjulor wan leh bor” ong u Waheh Shnong barim u bah Ras Rymbai.
U wei na ki dkhot shnong ka Pynurkba, u bah Ebormiki Dkhar, u la ong ba “Ha kaba iadei bad ka jaka ba wan kam pud ki Bataw naduh ki por barim ki riew rim ki la wan ïalam ïa ngi shane ban ïa trei ia ktah bad ong ruh ba ka dei kaba dng hap hapoh u pud u sam ka shnong Pynurkba “hynrei kaba pynsngewsih pat ka long ba myn ha ka 24 tarik ki nongshong shnong jong ka Bataw ki la wan sha kine ki jaka ki la tih nala bad kam pud bad sngew lehraiñ ban ong ba kat ka shnong Bataw kan wan leh kumne”
U bah Philip Rymbai, uba na ka shnong Pynurkba u la ong bad kynnoh ba haba peit ïa kato ka jingwan ki paidbah ka shnong Bataw myn ha kane ka 24 tarik ka la long kumba ki pynkhih paidbhur bad kaba lah ban wanrah pynban sha kaba sngewsih lada jia ba bakla kren uto u briew uba na Pynurkba uba ki ïa kynduh, hynrei u Blei u donlang don ryngkat bad ka shnong ka thaw . Haba phai sha ki sngi ki por ha kaba nga la ju bat kum u Secretary Shnong ngi la iaid lynti bun snem bha ha kaba ïadei bad kane ka jaka bad ha kaba kut ka Elaka ka la ong ba haba peit ïa ka jingjngai bad jingjan ki jaka rep bad ka shnong Bataw nga kwah ban ong ïa ki Bataw ba kam bha ban shu leh kumne watla ngi dei ki shnong ba rit, kane ka long ka bym sngewtynnad, ngi ngim kwah ïa ka jingsngewsih hynrei ngi kwah ïa ka jingiaieid kum para jan shnong ngi long kum ki para jan ïing hi hynrei ngin iakren da kaba sngewthuh para ma ngi ym ban shu pynpaw sha ki pathaikhubor, dei namar ba ki pynpaw sha ki khubor kumta ngi ruh ngim banse ban pynpaw, nga kwah ban ong ba ki Bataw ba na ka 1000 sq mitar ka jaka ka Pynurkba ka ioh tang 300 sq mitar”
Shuh shuh u Waheh Shnong barim u bah Ras Rymbai bad u dkhot dorbar shnong, u bah Ebormiki Dkhar bad u bah Philip Rymbai ki la kynnoh ba ka shnong Bataw myn ha ka 24 tarik ka la wan ban tur bad wan ban kyntur pud sha ka ki bynta ba dang hap hapoh ka shnong Pynurkba bad ruh katkum ka ujor ba la phah sha ka tnat pulit ha Ladrymbai myn ha ka 26 tarik mynta u bnai naitung, ka Dorbar Shnong Pynurkba ka la ong ba dei ka shnong Pynurkba kaba la long trai ïa ka khlaw kaba ju khot ka Lum Pdak-Pdak kaba hap hapoh elaka Rymbai bad kane ka jinglong trai ka shnong Pynurkba ïa katei ka khlaw ka dei lyngba ka jingpynbna ne ka notification ba la pynmih da ka Jaiñtia Hills Autonomous District Council, Dated Jowai the 6/3/2020.