Mih paidbah ka elaka Sutnga ban pynphai ïa ki kali kit niut ka JMB ba thmu wan bret ñiut ha elaka

Khliehriat Ïaiong 22: Ki paidbah jong ka elaka Sutnga, hapoh ka jingïalam ka Hima Sutnga Youth Federation lem bad ka Joint Village Defence Party Elaka Sutnga, mynta ka jan miet ki la ïa mih paidbah bad ap ha surok ha Sookilo, ka jingthmu jong ki ka long ban pyn phai dien noh ïa ki kali kit ñiut jong ka Jowai Municipal Board kiba thmu ban wan bret ñiut shapoh ka elka Sutnga.
Ha kane ka jingmih paidbah la don lang u ADC East Jaiñtia Hills District, u bah S.S.Syielieh bad ki pulit pahara kiba la shim khia ba kan nym mih kano kano ka huri hura.
Kane ka jingmih paidbah ka long hadien ba ki la ïoh jingtip ba ki don ki kali jong ka JMB kiba thmu ban wan bret ñiut sha elaka Sutnga bad la ong ba kita ki kali kit ñiut ki poi tang ha Ladrymbai bad ki la phai dien noh sha Jowai, West Jaintia Hills ryngkat bad kita ki ñiut ba ki kit.
Haba kren sha ki pathai khubor, u General Secretarary jong ka Hima Sutnga Youth Federation, u bah ïoowanki Chyrmang, u la ong ba “Naduh ba la mih ka jingpynbna ban leit bret ïa ki ñiut sha kane ka elaka Sutnga, ngi kum ki nongïalam ngi pyrshah jur ïa kane ka jingthmu, kumta ngi ap ha kane ka jaka da ka jingthmu ba ngin pynphai dien noh ïa ki kali kiba kit ñiut, namar ngi ka HSYF lem bad ki paidbah ka elka ngi pyrshah jur ïa kane”
Kumjuh ruh na ka liang u General Secretary jong ka Joint VDP Elaka Sutnga, u bah Pynbait Sutnga, u la ong ba na ka liang ka VDP ruh ka pyrshah jur ïa kane ka jingthmu wan bret ñiut sha elaka Sutnga bad ïathuh ruh ba ha u snem 2021 ruh ki dkhot ka Joint VDP Sutnga ki la pynphai dien ïa ki kali kit ñiut kiba mut ban wan bret ñiut ha elaka Sutnga “Kumta ngi maham jur ïa ka Jowai Municipal Board ba ym bit ban wan bret ïa ki ñiut hapoh u pud u sam jong ka elaka Sutnga bad lada lap ngin leh da kaba tyngeh” u la ong ruh ba ka VDP lem bad ki paidbah ka elaka ki long peitngor bha halor kane ka jingthmu wan bret ñiut ka JMB..
Kum ban shu pynkynmaw, ka Hima Sutnga Youth Federation (HSYF) kaba ju iatreilang ruh ban ka ophis jong u Acting Doloi Sutnga kumjuh ruh bad ka Joint VDP Sutnga, ka la dep buh ïa ka jingmaham bad ong ba kane ka jingmaham ka dei hadien ka jingmih ki khubor ha ki pathai khubor ba u bah Damewanhi Rymbai, uba na ka shnong Moolamylliang u la soi ïa ka soskular bad ka Jowai Municipal Board myn ha ka 20 tarik mynta u bnai ha kaba u la kular ban ai ïa ka jaka jong u kaba dei ka thliew dewiong kaba don ha shnong Moolamylliang ban bret ïa ki ñiut na Jowai, kumta ka HSYF ka ieng pyrshah bad khanglad ïa kane ka jingthmu.
La maham ruh ba lada ka Jowai Municipal Board ka leh jubor halor kane, ka seng HSYF kan nym shim ïa ka jingkitkhlieh lada jia kaei kaei kaba sngewsih.