Nongpoh, Lber 31: Ka long ka jingheh mynsiem bad ka jingshngaiñ ïaka party Congress ha Nongpoh hadien kong Rona Khymdeit kaba dei ka MDC barim jong ka party UDP na Nongpoh ryngkat ki spah ngut ki nongbud mynta ka sngi kila leit ban pynïasoh ïalade bad ka party Congress bad ieh noh shadien ïaka party UDP naka bynta ban pynkhreh ïaka elekshon sha ka iing Dorbar thawaiñ ha u snem 2023.
Katei ka jingmih noh ka kong Rona Khymdeit naka party UDP lah ruh ban ong ba ka long ka jingduh kaba khraw ïaka party baroh kawei namar ka dei ruh kawei naki nongïalam ba radbah jong ka party UDP khamtam ba ka dei ruh ka MDC kaba rim na Nongpoh Constituency.
Naka liang ka party Congress mynta ka sngi da ka mynsiem kaba kmen kala pdiang burom ïaka kong Rona Khymdeit ryngkat ki nongbud haka jingïalang kaba long ha Indoor Stadium Nongpoh bala sakhi ruh da ka jingdon lang ki nongïalam jong ka Congress naduh u Ma Vincent H Pala, Bah PN Syiem, Dr F Lyngdoh Nonglait, Bah Charles Marngar, Dr Celestine Lyngdoh MLA barim ka Umsning bad kiwei kiwei ki nongïalam bad ki riew rangbah.
Ha katei ka sngi naka liang ka party Congress kala pynbna syndon ruh ïaka ticket sha ka Kong Rona Khymdeit kum ka kyrtong jong ka Congress na Nongpoh Constituency ban aireng pyrshah ïa u Bah Mayral Born Syiem watla um pat pynbna ba un mih noh naka Congress.
Haba kren ha katei ka sngi naka liang u Ma Vincent H Pala u la pynpaw ba kum ka party Congress kan dang pynkhlaiñ ïaka party ha baroh ki district haka jylla naka bynta ban pynkhreh ïa ka elekshon 2023 bad khlem artatien ba ka party Congress kan jop bun tylli ki seat ha kane ka elekshon ban wan watla bun naki nongïalam ba radbah kila mih noh pynban ka jingkhang ka plie pat ïa shibun ki nongïalam kiba dang phaikhmat bad dang shaniah haka party Congress.
Naka liang ka kong Rona Khymdeit haba kren ha katei ka sngi kala pynpaw ka jingsngewkmen bad ka jingsngew hun hadien ba kala pynïasoh ïalade bad ka party Congress, kaba dei kawei naki party kaba khlaiñ bor haka jylla Meghalaya bad kadei ka rai bad ka sienjam kaba biang eh ba kala shim ban iehnoh ïaka party UDP bad ban pynïasoh ïalade bad ka party Congress ryngkat ka jingkyrmen kaba skhem ba kan jop ha kane ka elekshon ban wan na Nongpoh Constituency.
Kiwei kiwei ki pynïasoh Congress ha katei ka sngi ki kynthup ïa u Rev PW Pnar, Bah S Malai DSP barim ka Ri-Bhoi District bad kiwei ki nongkyrshan kiba kyrsnan ia ka Kong Rona Khymdeit.
