Jowai, Nohprah 16: Ki player ka Demthring SC kila mih madan haka 15 tarik da kaba shu ïeng beit ha madan khlem da ïakhuh pyshah ïa ki rangïalehkai jong ka Ladthadlaboh SC haka jingïakhun Semi Final ba khatduh na ka bynta ka jaka sha ka Final jong ka lympung ‘Super Division Football Tournament– 2025’ bala pynïaid daka West Jaiñtia District Sports Association, (WJDSA).
Kane ka jingleh jong ka Demthring SC ban nym ïakhun pyrshah ka long naka daw ka jingshah Suspend ki player ka Demthring bad ki Official jong ka, hadien ka jingshah rem haka Khimusniang SC da 2-1 kol haka jingïakhun Semi Final- 1 Qualifier haka 5 tarik u Nohprah da kaba kynnoh ba ka dei na ka jingshah shilliang u Referee kaba la pynmih ka jingïaklumar ha madan.
Haba phai sha ka jingïakhun Semi Final ba khadduh ha kane ka 15 tarik la rai jop ïa ka Ladthadlaboh SC da kaba ïoh thep haduh 9-0 kol bad bun na ka por ïakhuh ki player jong ka Ladthadlaboh SC kila shu lehkai para maki da kaba ïa pass kylling ïa ka bol haduh ba kut jong ka por namar ka jingbym kwah ban ïakhuh ka Demthring SC.
Na la liang ki nongkyrshan jong ka Demthring SC ruh kila wan sha madan ka Kiang Nangbah Stadium, Dongmihsngi Jowai ha ryngkat ki lama ïong bad ka jingpyrta ban pyrshah ïa ka WJDSA kaba la suspend ïa ki player jong ka.
