Jowai, Nailur 22: Na ka daw ka jingbret pathar kat shaba lap ïaki ñiut ki ner sha ki bynta jong u surok Lulong College bad ki bynta ba shadien jong ka surok Thomas Jones Synod College Jowai, mynta ka sngi na ka liang ka ophis jong ka Jowai Municipal Board (JMB) Jowai kala pynlong ïaka jingleit pynkhuid ïa kitei ki ñiut shi bynta naka prokram ‘Swachhata Hi Seva Campaign 2025’ kaba la sdang naduh ka 17 tarik u Nailur bad yn pynkut haka 2 tarik u Risaw 2025.
Ha kane ka jingpynkhuid ïa ki ñiut la lam khmat da ka Chief Executive Officer ka JMB ka kong D.V. Lyngdoh (MCS) kaba la ban jur ba kane ka jingbret pathar ïa ki ñiut kala wanrah ïaka jingjaboh bad ka jingsma iwtung ha ki bynta surok bad kala pynsniew dur ïa katei ka jaka naka jingdon ki ñiut ba bun.
Hashwa kane ka kong Lyngdoh kala ong ka jingpynlong ïa kane ka prokram ka long shi bynta na ka jingbthat da ka Ministry of Housing and Urban Affairs (MoHUA) da kaba kila jied pynlong ka jingpynkhuid mynta ka sngi ha ki ar jaka kiba jur palat ka jingbret pathar ïa ki ñiut.
Ha kane ka sngi la wan ban ïashim bynta da ki Home Guard (Training) ki Scout and Guide, ki khynnah NCC & NSS jong ka Thomas Jone Synod College bad ki khynnah NCC ka Kiang Nangbah Govt. College Jowai, kiba la sdang ban pynkuid naduh ka por 10 baje mynstep bad hadien ka jingpynkhuid la pynkit ïa ki ñuit da ki trok ka JMB.
