Mih ki soh nyngkong jong ka Northern Ri-Bhoi College, pynkup burom 25 ngut kiba la pyndep BA

Nongpoh, Naiwieng 09: Ki bor pynïaid jong ka Northern Ri-Bhoi College, Diwon mynta ka sngi kala pynkup burom ïa 25 ngut ki samla kiba la pyndep ïaka Bachelor of Arts, bad kiba dei ruh ki soh nyngkong ba katei ka College ka pynmih namar ka dei ka College kaba dang shu sdang ha u snem 2021.
Ha kane ka sngi ka jingpynkup burom ïa kitei ki samla bad kumjuh ruh ka jingpynkut ïaka jinglehkmen College Week ba nyngkong jong katei ka College, la wan ban sakhi da ka jingdonlang u Bah Mayral Born Syiem MLA ka Nongpoh ba dei ruh u Chairman jong ka Northern Ri-Bhoi College kum u kongsan haka jingdonlang u EC Benny Principal ka Ri-Bhoi College, Nongpoh, Bah Hesting Syiem Principal ka Nongtluh Higher Secondary School, ki riew rangbah, ki nonghikai lem bad ki samla pule jong katei ka College.
Ha katei ka sngi naka liang ki bor pynïaid kila pynkup burom ruh da ki mementoes sha 25 ngut ki samla kiba dei ki batch ba nyngkong jong katei ka College bad kiba la pyndep ïaka Graduate kaba long ruh ka jingkmen kaba khraw ïa katei ka shlem pule.
Haba kren ha katei ka sngi naka liang u Bah Mayral Born Syiem u la pynpaw ka jingsngewkmen kaba khraw ban iohi ïaki soh nyngkong jong katei ka College kaba dang shu sdang ha u snem 2021 namar ïa katei ka College la seng namar ka jingphohsniew bad ka jingangnud jong u Dr DD Lapang u ba angnud ban don ki shlem pule khamtam ki College ha ki thaiñ nongkyndong ban pynsuk ïaki kmie ki kpa bad ki samla pule.
U la ong ruh ba kam long kaba suk ban pynïaid ïa katei ka College naduh ka tulop ki nonghikai bad kiwei kiwei ki jingdonkam namar katei ka College kam pat don wat tang ka building kaba pura hynrei la shu pynlong class mynta haka iingskul barim jong ka Nongtluh Higher Secondary School, hynrei kum u MLA u pan map naki samla pule wat hapdeng shibun ki jingeh kila trei shitom bad minot ban pyndep ïaki jingpule bad khmih lynti ba ha ki khyndiat snem ban wan katei ka College kan sa ioh da ka iing building kaba paka.
U la kyntu ruh ïa kitei ki samla bala pyndep ïaka Graduate bad kumjuh ruh kiba dang pule ba kin minot thop haki jingpule khamtam haki jingpule ba kham shalor ba kin im ka jingim kaba don akor, ban tip ïala ka tynrai khnang ba kin poi sha ka thong haka jingim jong ki.