Shillong, Naitung 29 : U Bah Banteidor Lyngdoh, Myntri ka tnad ïalehkai jong ka sorkar jylla u la pynpaw ka jingsngewhun namar ka jingnang lap ïa ki sap kyrpang ha ka sngi kaba lai jong ka State talent Identification program kaba la long ha ka sngi Palei kaba la pynlong da ka Meghalaya State Olympic Association (MSOA), da ka jingkyrshan jong ka tnad Sports and Youth Affairs bad ïa kaba la pyntreikam da ka Edge10 Group, ha ka jingïalam u Ian Campbell na Australia uba dei u nongïalehkai Olympic uba la paw ha ka pyrthei ha kaba u la thaw record ha ka triple jump ha ka 1980 Moscow Olympics.
Ha kane ka jingwad ïa ki sap kyrpang ka MSOA lyngba ka jingïarap u Ian Campbell, uba la wanrah ïa ki kor ki tiar kiba thew ïa ka jingstet ka bor, bad ka jinglah ki khynnah ban kynthih u la pynpaw ïa ka jingkyndit ban lap katne tylli ki sap hapoh ka jylla Meghalaya namar u ong lyngba kine ki jingthew thik “numbers dont lie” u la pynpaw ba ha ki Ri kiba khlaiñ ha ka sports ka test kaba nyngkong kaba ki leh ïa ki samla ka long kine saw tylli kata ka 20M sprint, 10M Speed ladder run.
Ka Compass Drill bad ka Verticle Jump kiba poi shakhmat bad ki ba don ka juh ka jingthew lane kiba ïajan ka jingthew bad ki player jong ka Australia bad USA ha baroh kine saw tylli la kheiñ ïa ki “super elite” bad kiba poi shakhmat ha 1 ne 3 tylli ki test ki ong “elite” kaba phylla ka long ba kiba bun ki samla na ki saw hajar tam ki samla kiba la shah test ha jylla Meghalaya la shem 4 ngut kiba hap ha ka kyrdan super elite bad 23 ngut kiba hap ha ka kyrdan elite. shuh shuh ki don ruh kumba 100 ngut kiban don ha ka kyrdan “development” namar ki dang donkam shuh shuh ka jinghikai ban ïoh ban pyrshang biang.
U Myntri ka tnad Sports, u Bah Banteidor Lyngdoh, ha kaba ïakren bad u Ian Campbell, bad u Bah John F Kharshiing, Working President, Meghalaya State Olympic Association, u la ong ba ka thong jong ka sorkar ka long kumno ban ïoh sei ïa ki rang kynsai ki ban poi sha ka kyrdan jong ka National, Commonwealth, Asian Games, World Championships, bad khamtam sha ka Olympics.
U la pynpaw ïa ka jingangnud jong ka sorkar ban pynbiang ïa ka lynti ban ai jinghikai ïa kiba la lap lyngba kane ka talent identification kaba la leh katkum ki Ri kiba jop medal bad u la ong ba ïa kane ka program ka sorkar ka dang khmih bniah bad ka lah ban phah biang ïa kane ka talent identification sha ki Block khnang ban ïoh ban lap ïa baroh ki sap kiba don sha kyndong.
Ha ka jingïakren na ka liang u Ian Campbell, u la pynpaw markhmat ha u Myntri ba khlem artatien ba ki don bun ki sap kyrpang jong ki samla hapoh ka jylla Meghalaya bad donkam ban ïatreilang ka MSOA bad ka Sorkar Meghalaya ban kyntiew ïa kitei ki sap sha kawei pat ka kyrdan ïa kaba ha shen yn da dep kane ka talent identification ka kynhun jong ki kan sa ai ïa ki jingai jingmut halor kumno ban leh ïa kitei ki sap kiba la lap.
U Bah John F Kharshiing, Working President, MSOA, u la ong ba ka 29tarik Naitung 2022 ka long ka sngi khatduh ïa kane ka talent identification program bad u dap da ka jingkmen ban ïohi ïa ka dur dap jingkyrmen ki samla ka jylla haba la ïaid lynti mynta jong bad kyrmen ba nangne shakhmat lyngba kane ka jingpyrshang kaba thymmai kin ïai mih ki sap kiban poi sha ka National, Commonwealth, Asian Games, World Championships, bad ka Olympics.
U la ong ba u Ian Campbell lada thew sha ka kyrdan kaba halor kum ka Olympics donkam ïa ki samla ba kin don ka jingthrang ym tang shispah na ka shispah hynrei u la ong donkam ïa u ne ka ban da don ka jingthrang kaba shispah sanphew percent bad ka jingminot ka jingtreishitom.
U la ong ba hadien kane ka kynhun u Ian Campbell, Olympian un sa ai ka kaiphod kaba bniah halor iwei pa iwei i samla iba la wan pyndep ïa ki 4 tylli ki test. U la ong ba ka kynhun Edge10 kan sa phah ïa ka result jong baroh ha ryngkat ki jingai jingmut sha ka MSOA bad ka tnad DSYA khnang ba kin lah ban phah sha baroh ki samla ki skul lyngba ka email/softcopy.
Ha kine ki sngi la shem ïa uwei u samla ïalehkai Karate uba sah hapoh SAI u samla Cheltis Shylla, 17 snem rta u la mareh ha ka 20M sprint 2.97sec, ka speed ladder run 2.58sec, bad ha ka compass drill u la mareh 7.06 Sec, bad ha ka Verticle Jump u ka kynthih haduh 75.3cm. Une u samla u la jop takma teng ha ka National Karate Championships.
Shuh shuh ha ka sngi Palei sa uwei u samla Gregorwilson Makdoh, 14 snem ka rta u la kynthih haduh 62.5cm. Katba u Rayan Kharkongor 12 snem ka rta u la kynthi haduh 57cm ha ka verticle jump, u la mareh ha ka 20M sprint 3.31 sec, bad ha ka speed ladder run u la her 3.1 sec. Bad ki dang bun kiwei pat kiba la leh bha ha kane ka sap ha kaba ki la sei ïa ki sap jong ki.
