Shillong, Ïaiong 24 : Ki khynnah skul bad ki nonghikai jong ka Shillong Secondary School, Forest Colony Shillong, ki la mih shakhmat ban pynsngewthuh ïa ki paidbah halor ki jingma kiba mih na kaba pyndonkam ïa ki jingbam jingdih ba shna na u duma.
Ha katei ka jingpynshai paidbah kaba ki pynlong ha Polo, katei ka kynhun ki la pyni ruh da ki kynja skit katkum ki kyndon jong ka National Health Mission (Meghalaya) ba ka jingpyndonkam ïa kitei ki jingdih jingbam ka ktah haduh katta katta ïa ka met bad ïa ka koit ka khiah jong kito kiba pyndonkam bad kyrni ïa u.
Lyngba ka jingtrei borbah lang bad ki nonghikai, na ka liang ki khynnah skul ki pyni bad pynsngewthuh ba lai lum lai wah dei ban kiar na kum kitei ki jingdih namar ki dei ki nongshun ïa ka jingkoit jingkhiah.
