Khliehriat Lber 11 : Ka ophis jong u Directorate of Sports & Youth Affairs, Meghalaya, Shillong ha ryngkat ka jingïatreilang bad ka ophis jong ka District Sports Officer, East Jaiñtia Hills District lem bad ka Rymbai Government Higher Secondary School Khelo India Centre ha ka sngi saitjaiñ ka 08 tarik u lber 2025, ka la pynlong ïa ka Archery Tournament ka jingïasiat khman ha madan jong ka Rymbai Wahshnong Playground, East Jaiñtia Hills District, kane ka jingïalehkai siat khnam ka long ruh shibynta ban kyntiew ïa ka kam ïalehkai sport hapoh ka district khamtam ki kynthei.
Ha katei ka sngi la ïa don ryngkat lang ruh ka District Sports Officer (DSO), East Jaiñtia Hills District, ka kong Stephanie M. Rapsang, ka Principal jong ka Rymbai Government Higher Secondary School, ka kong Younilas Lamare, u Finance Secretary, jong ka shnong Rymbai, u bah Shri C. F Bareh, General Secretary, East Jaiñtia Hills District Sports Association (EJDSA), u bah Coming Tlang bad kiwei kiwei.
Ha katei ka jingïalehkai siat khnam la ïa shimbynta da ki kynthei kiba ha ka kyrdan Senior, Junior bad Sub-Junior bad la ai khusnam sha kiba jop da ka pisa T1500/ tyngka sha kiba rah ïa ka nam lahduh, T1000/-tyngka sha kiba wan ba ar abd T 500/- tyngka sha kiba wan ba lai.
Ha ka kyrdan Senior Individual Category, ka kong Isabella Tlang ka la rah ïa ka nam lah duh, ka kong Gratify Nongpluh ka la wan ba ar bad ka kong Aibanhun Lyngdoh ka la wan ba lai.
Ha ka kyrdan Junior Individual Category, ka Jasmine Nongpluh ka la ïoh ïa ka nam lah duh, ka Ebanroiki Bareh ka la long ba ar bad ka Fatima Lyngdoh ka la long ba lai.
Ha ka kyrdan Sub-Junior Individual Category, ka Philawanshwa Thoo, ka la long ba nyngkong, ka Tredaka Nongtdu ka la long ba ar bad ka Victoria Rymbai ka long ba lai.
