Nongpoh, Nailar 22: Ki paidbah nong shong shnong na kumba 14 tylli ki shnong ka thaiñ Tyrso, naduh ki Self Help Group, ki Village Organisation kila ïalum paidbah haka sngi Saitjaiñ haka shnong Tyrso ban pynpaw ïaka jingeh halor ka jingnoh shilliang ka rukom ai ïaki card rashon sha ki paidbah bad ban dawa naka sorkar ba ka dei ban peit bad pynbeit ïaki jingeh jong ki paidbah nongshong shnong ha katei ka thaiñ.
Ki longkmie kiba rah ryngkat bad ki khunrit kila mih paidbah ha katei ka sngi ban dawa ruh ïaka hok jong ki ban pynioh card rashon katkum ka hok ki longiing ba duk (BPL), kumba la ioh jingtip ba ha kitei ki shnong ki paidbah kiba duk kim ioh satia ïaka card rashon naka bynta ki longiing ba duk, hynrei kaba sngew lyngngoh ka long ba ki longiing ba bit ba biang ki ioh ïaka card rashon jong kiba duk.
Ha katei ka sngi la wan ruh ban pynshit pynshngaiñ da u Bah P shadap Rangbah shnong ka Tyurso Umlyngdoh, ka kong Sisilia Wahlang President ka Village Organisation Umtngam bad kiwei kiwei ki riew rangbah.
Haba kren ha katei ka sngi naka liang kitei ki nongïalam kila pynpaw ba ka jingsngewkhia kaba jur ba ki longiing ba duk kim shym la ioh ïaka hok kaba ki dei ban ioh katba ki longiing ki ba bit ba biang ki bam ïaka hok jong kiba duk ba rangli bad kane kam long satia katkum ka jingkwah jong u Myntri Rangbah ka Ri u Narendra Modi ban rat diengkhong ïaka jingduk jingkyrduh kumba kawei pa kawei ka longiing ka dei ban ioh ïaki khaw rashon kumba la bhah da ka sorkar.
Kitei ki nongïalam ha katei ka sngi kila ther ruh ba ka jingioh ïaki card rashon ka long noh shilliang ha katei ka thaiñ watla bun ki paidbah ki dei kiba duk ba rangli bad kiba im da ka kam rep kam riang bad kidei ki briew kiba duk ba rangli hynrei kaba sngewsih ka long ba bun naki longiing ba duk kim ioh ïaka hok jong ki ban ioh ïaki card BPL, katba ki don ki longiing ba bit ba biang kiba ioh ïaka card rashon jong ki longiing ba duk kaba ktah shibun ïaki longiing ba duk ba rangli.
Ha katei ka jingïa mih paidbah kila shim ruh ka rai ban leit mih sha ka tnad Supply naka bynta ban peit bad khmih ïaka jingeh jong ki paidbah ha katei ka thaiñ kumba ki paidbah ki mad jingeh ha kaba ïadei bad ka jingnoh shilliang ka rukom sam ïaki card rashon bad dawa ruh na u Deputy Commissioner ban shimkhia ïa katei ka kam kaba ktah ïa u duk u suk bad kumjuh ruh ban pynthymmai ïaka rukom sam ïaki card rashon katkum ka hok ba ki longiing ki dei ban ioh ha katei ka thaiñ.
