Mih ki paidbah jong ka shnong Nongspung A ba shah hukum pynpra dukan haka KHADC
Ba kynnoh shong dukan beaiñ ha jaka khlaw shnong Umtyrnga-Nongspung B
Nongpoh, Naitung 29: Ki paidbah jong ka shnong Nongspung A mynta ka sngi kila mih paidbah ban pynpaw ka jingsngewkhia bad pyrshah jur hadien ba ka KHADC kala phah syndon da ka shithi lyngba u Deputy Secretary ka Executive Committee ban hukum ïaki nongshong dukan hapoh ka Nongspung A ba kidei ban pynpra noh ïaki dukan jong ki bala kynnoh ruh ba ki shna beaiñ ïaki dukan haka jaka kaba dang hap hapoh u pud u sam ka khlaw shnong Umtyrnga Nongspung B.
Naka liang ki trai dukan bad ki trai jaka da ka jingpyrshah jur kila mih paidbah ryngkat ki nongïalam shnong kiba la kam ruh ba katei ka jaka kaba ki shong dukan kam dei jong ka Khlaw Shnong Umtyrnga Nongspung B, hynrei ka dei ka jaka ba dei hok jong ka Nongspung A kaba hap hapoh ka jingpeit jong ka Raid Marwet Mylliem Syiemship.
U Bettin Marak u ba dei u Rangbah Shnong jong ka shnong Nongspung A u la pynpaw ba kum ka shnong ka dap da ka jingsngew lyngngoh bad sngewsih ba la palat 40 snem ba ki shong dukan ha katei ka jaka ym ju don ba pynthud lane ban wan kam ïa katei ka jaka hynrei mynta syndet syndet kala mih ka jingkam trai ïa katei ka jaka kat haduh baka KHADC kala hukum pynpra syndon ïaki dukan jong ki nongshong shnong, kaba lah ban don kaei kaei sha lyndet.
U la ong ruh ba katei ka jaka kam don kano kano ka huri hura naduh ki por ba mynshuwa ba ki paidbah ki shong suk shongsaiñ hynrei ka jingwan kam trai ka shnong Nongspung B bad Umtyrnga kala pynkynkit ïaki paidbah bala shu kam beit ïaki jaka ba ki paidbah ki shong dukan bad shna iing.
Ki trai jaka, trai dukan ki la pynpaw ïaka jing sngewrem ïaka jingleh jong ka shong Nongspung B bala shu wan kam jubor ïaka jaka jong ki bad bala shu ioh jingtip ruh ba ki hap ban pynpra noh ïaki dukan bad ki jaka shong jaka sah jong ki da ki phew snem lyngba ka hukum jong ka KHADC, ha kaba kila pynpaw ruh ba kin nym kynran dien bad kin ieng pyrshah halor ka jingthmu arsap jong ka shnong Nongspung B bad Untyrnga ban shu wan kam jubor ïa katei ka jaka bad kin nym ailad ban shu shah iuhroit ka hok jong ki.