Mih ki paidbah ban pynkhuid ïa ka Jingkieng Floyover ha Umiam

Nongpoh, Naitung 18: Ka Dorbar Shnong Pyllun ha ICAR, Umiam ha ka sngi Saitjaiñ ka la pynlong da ka jingpynkhuid paidbah ïa ka Jingkieng Flyover ha Umiam, kaba dei hadien ka jingisaitmet bad ka jingjaboh ba ki paidbah nongleit nongwan khlem da burom shuh ïa ka khuid ka suba ki la shu bret pathar ïa ki jaboh ha katei ka Jingkieng Flyover kaba la ktah ym tang ïa ka khuid ka suba jong katei ka Jingkieng bad ka pung Umiam, hynrei kane ka jingbret pathar ïa ki jaboh ka la ktah ruh ïa ka mariang.
Namar ka jingsngewkhia halor ki kam leh khlem akor ki nongleit nongwan, ka Dorbar Shnong Pyllun, ICAR, Umiam ha ka Sngi Saitjaiñ ha ka jingïalam u Rangbah Shnong, u Bah M. War bad u Secretary Shnong, u Bah M. Biam lem bad ka jingïasnoh kti lang ki seng longkmie ba la lamkhmat da ka Kong M. Kharsahnoh ryngkat ki VDP ki la mih ban pynkhuid ïa katei ka jingkieng Flyover kaba don ha Umiam.
Kaei kaba pynpangmet bad sngewkhia ïa ka bor shnong, ka dei ka jingleh khlem akor ki paidbah nongleit nongwan ha katei ka jaka, ha kaba ki la bret pathar naduh ki bitor kyiad, ki plastic, ki sop jingbam bad kiwei kiwei ki jaboh, kiba la ktah shisha ïa ka khuid ka suba bad ka jinglehraiñ ruh ïa ka Shnong ka thaw la kumba ym don kiba peit ba khmih ïa katei ka jaka ba dang hap ha u pud u sam ka Shnong Pyllun ha Umiam.
Kaba kham sngewkhia shuh shuh ïa ka bor shnong ka dei namar ba ki paidbah ki la pynlong ruh ïa katei ka jaka ha ka Jingkieng Flyover kum ka jaka dih kyiad bad ban leh ïa ki kam sniew bad ïa kane la sakhi na ka por sha ka por ba ki don kiba buaid tanglang bad ki la leh khlem akor ïa katei ka jaka kaba long ruh ka jingma ïa ka shongsuk shongsain ki paidbah.
Na ka liang u Rangbha Shnong, u Bah M. War ryngkat kitei kiwei ki nongïalam ki la pynpaw ka jingsngewkhia halor ka jingleh khlemakor ki paidbah ban pynjaboh ïa katei ka Jingkieng Flyover bad ki la madan tyngeh ruh nangne shakhmat ba lada lap ïa kino kino kiba leh khlem akor bad kiba bret jaboh ha katei ka jaka kin dain da ka kuna kaba T. 5000 bad lada ki pyneh ne ïaleh pyrshah kin aiti ruh wat sha ki bor ka aiñ.
Na ka liang ka Dorbar Shnong ka la buh ruh ka jingmana kaba tyngeh ïa ki paidbah nongleit nongwan bad wat ki trai shnong ruh ba kim dei ban leh khlem akor ha katei ka jaka bad ha kajuh ka por ruh ba kim dei ban bret jakhliah, bret bitor kyiad bad bret plastic, namar kane ka ktah shisha ym tang ïa ka khuid ka suba jong ka pung umiam bad ka ktah ruh wat ïa ka mei maring, ong kitei ki nongïalam Shnong.
Shuh shuh, na ka liang ka Dorbar shnong ka kyrpad ruh ïa ki bor Pulit ka Umiam ba kin pynlong ïa ka jingpeitngor na ka por sha ka por ha katei ka jaka bad kumjuh ruh ïa ka bor District ba kin phai khmat lem ban teh pyrkhing ïa kito kiba leh khlem akor, namar lada ym don ka jingmana ne ka jingpyrkhing da ka bor District kiba bun ki wan ban shim kabu ban leh jakhlia bad ban bret ruh ïa ki jaboh kaba long ka jingisaitment ïa ka pung Umiam kaba dei kawei na ka jaka jongohkai pyrthie ba paw jong ka jylla, ong kitei ki nongïalam Shnong ka Shnong Pyllun, Umiam.