Mawkyrwat, Naiwieng, 21: Ka ophis jong u Deputy Commissioner, South West Khasi Hills District ha ryngkat ka jingïatreilang bad ka ophis jong u District Sports Officer, ka ophis u Superintendent of Police bad ka ophis jong u District Planning Officer, kum ka dak ban kynmaw burom, ki la pynlong ïa ka “Sardar@150 Unity March – Ek Bharat, Aatmanirbhar Bharat” ha Mawkyrwat.
Ïa kane ka Unity March la sdang na phyllaw jong ka Sngap Syiem College, Mawkyrwat bad la ïaid lyngba Ïew Mawkyrwat – State Bank of India – Meghalaya Rural Bank haduh ban wan phai biang sha Sngap Syiem College. Ha kane ka jingïaid paidbah, haduh 300 ngut ki la wan ïashim bynta, kaba kynthup ïa ki ophisar, ki samla pule, ki khynnah skul lem bad ki nonghikai.
Lah ban kdew hangne ba kane ka Sardar@150 Unity March ka long kum ka sienjam kyrpang ban burom ïa ka jingdap 150 snem ka jingdap synjuk jong u Sardar Vallabhbhai Patel, uba la noh synniang kaba khraw ha kaba pynïatylli ïa ka ri India. Kane ka long ruh kum ka bynta jong ka Ek Bharat Shreshtha Bharat, kaba ïa ryngkat bad ka thong Viksit Bharat bad Atmanirbhar Bharat kaba la pynbor da u Myntri Rangbahduh ka ri.
Ka jingïalang pynsngewthuh shaphang ka Unity March 2025 ka pynpaw ïa ka rukom treikam kaba la pynbeit ryntih bad kaba kynthup shibun ki kyrdan, ha kaba ki distrik bapher bapher ki ïashim bynta lang kum shi bynta jong ka Padyatra jong ka ri ban burom ïa ka pateng u Sardar Patel.
Ha kane ka sngi la donlang u Bah F.B. Basan, MCS, Additional Deputy Commissioner, kum u Kongsan; u Bah B. Jyrwa, MPS, Superintendent jong ki Pulit, kum u Symbud Kongsan; bad kiwei de kynthup ïa u Himanta Timung, Co-ordinator Unity March; u Bah D. Syngkon, District Sports Officer; ki nonghikai, ki khynnah bad ki samla pule.
Ki jingrwai bad ki jingïalehkai tynrai ki kynthup ruh ïa ka jingrwai National Song da ki khynnah jong ka JNV, South West Khasi Hills District, ka Folk Song na ki samla pule jong ka Sngap Syiem College, Mawkyrwat bad ka Folk Dance na ka Ri Maram Folk Academy, Mawlangwir.
Ïa ka jingïalang la pynïaid da ka Kong I. Thabah, Child Development Project Officer (CDPO), ICDS Project Mawkyrwat, katba ïa ka jingkren khublei la ïoh na u Kashih Jethwani, Deputy Director, MY Bharat.
