Nongpoh, Ïaiong 28: Wat hadpeng ka jingduh jingkyrmen hadien ba ka eriong ba jur ka la pynjot bad pynpra noh ïa ka pandal jong ka jingïaseng General Assembly ka Presbyterian Church of India ba la pynbeit ban kan sdang naduh ka 27 tarik u Ïaiong haduh ka 1 tarik u Jymmang 2022, kaba dei ka sngi U Blei bad ka long pat kajingai mynsiem ïa ki bor pynïaid jong kane ka jingïaseng Assembly ha kaba ki paidbah da ka mynsiem jong ka jingsngewkhia ki la wan ban ïa mih paidbah na ka bynta ban maramot ne pynbha biang ïa kane ka pandal jong katei ka jingïasengbah ka Balang Presbyterian ba la pynbeit ban long ha Umroi Madan.
Kum ban pynkynmaw, kane ka Pandal jong ka jingïaseng General Assembly ka Presbyterian Church of India ha ka miet jong ka sngi ba-ar mynta ka taiew ka la shah khyrwit jem ha ka eriong bad kane ka eriongbah ka la pynjot lut ïa baroh ki jingpynriam bad ki jingshna ïa kane ka pandal ba ïa kane ka jingïaseng 44ty General Assembly la pdiang sngewbha da ka Balang Presbyterian Umroi ha ka jingpeit jingkhmih ka Ri Bhoi Presbyterian Synod.
Da ka jingsngewkhia, ban maramot ne pynbha biang ïa kane ka Pandal jingïaseng bah, naduh ka Dorbar Shnong Umroi Umdohbyrthih, Umroi Madan, Umroi Labasan Saro, Umroi Jaiaw bad ka Umroi Nongrah ki la ai ka jingïatrei lang bad kynthup ruh ki paid riewngeit na ki kynhun balang bapher bapher, ka TULBA Ri Bhoi District ki la ai ka jingïatrei lang na ka bynta ban pynbha ïa kane ka Pandal.
Kumba la pyntip da u Tbn. Ever Pynrope na ka Balang Presbyterian Umroi, la ong ba kane ka jingmih ki paidbah nongshong shnong, ki kynhun seng na ka TULBAbad kiwei ki kynhun niam ka la ai mynsiem ïa ki bor pynïaid jong kane ka jingïaseng General Assembly, namar tang u Contractor un nym lah shuh ban pyndep ïa kane ka pandal bad da ka jingïasnoh kti lang ki paidbah ki la rai ban pyndep beit shuwa ka sngi U Blei khnang ba kane ka jingïaseng bah kan ïaid beit kumba la buh.
Na ka liang u Rangbah Shnong ka Umroi, Madan, u Bah Sen Thabah bad u Rangbah Shnong ka Umroi Dohbyrthih, u Bah P.B Sylliang ki la ong ba ka Dorbar Shnong ruh ka sngewsih halor kane ka jingjia bad ym shym la lah leh ei ei pat namar ka dei ka jingktah jong ka bor mariang.
Kitei ki nongïalam Shnong ruh ki la pynpaw ka jingsngew kmen ban ioh pat ba ki paidbah nongshong shnong na kitei ki san tylli ki shnong bad kynthup ruh ki Balang bapher bapher ba don hapoh kitei ki san shnong lem bad ka TULBA na Ri Bhoi ki la kloi ban ai ka jingïatrei lang na ka bynta ban maramot biang ïa kane ka padan ba la shah pynjulor ha ka eriong bad ki kyrmen skhem ruh ba da kajingïasnoh kti lang ki paidbah ne ki kynhun bapher bapher shuwa ka sngi U Blei ki la lah ban pyndep ne pynbit pynbiang ïa katei ka Pandal khnang ba kan nym thud kane ka jingïaseng General Assembly ka Presbyterian Church of India.
