Mih ka surok thymmai ban weng dheng kali ïa kiba leit sha ïewduh bad kumjuh sha Civil Hospital

Shillong, Ïaiong 04 : U Myntri Sorkar ka Jylla ba dei ruh u MLA ka Shillong South ha ka sngi Saitjain u la plie paidbah ïa ka surok bypass kaba 185 mitar kaba ïaid nadien jong ka NEFA Secretariat, Cantonment Area haka jinglut kaba kot sha ka 3.36 klur tyngka.
Haba kren ha ka jingïalang u Bah Sanbor u la ong ba kane ka surok kadei kaba la shna da ka jingïohi jngai jong ka sorkar MDA hapoh ka jingïalam jong u Myntri Rangbah Conrad Sangma bad Symbud Myntri Rangbah Bah Prestone Tynsong da kaba ïaid ryngkat ryngkat bad u kum u MLA ka thain.
U la ong ruh ba kane kan ïarap bha ban weng ïa ka dheng kali namar ki kali khamtam ïa kiba hap ban ïaid lyngba ka surok Civil Hospital bad ki bynta jong ka Jingkieng Umshyrpi namar kim donkam shuh ban ïaid kyllain na ka surok Anjalee Petrol pump kaba rim.
U Myntri u la ai ruh ka jingïaroh ïa ka jingtrei borbah jong ka tnad PWD Shillong Central Division kaba la lah ban pynwandur bad pyndep ïa kane ka surok hapdeng bun ki jingeh.
Na ka liang u Executive Engineer ka Shillong Central Division PWD Bah S Lytep ha ka jingkren maitphang u la ai ka jingïaroh ïa baroh kiba la don bynta ban pynlong ïa kane ka projek ba kan dep kloi.
La donlang ruh ha kane ka sngi naduh ka Rani Dibang, DRC jong ka sorkar Arunachal Pradesh, nangta u Superitending Engineer ka PWD, ki heh pulit, ki nongïalam shnong bad kiwei kiwei.