Shillong, Naiweing 24: Ka jingïalang thang mombati ki san seng ha ka sngi Palei ban ïa snoh mynsiem bad ki nongshong shnong ka Mukroh bad kiba ha ïing ha sem kiba duh noh ïa kiba ieid ba thoiñ ha ka ktang suloi ki pulit Assam ka la mih ka sur dawa ba ka sorkar ka dei ban shna noh ïa ka tnat pulit kyrpang ne ki Special Border Police Force ban pahara ïa ki Khasi kiba shong ha ka thaiñ khappud na ka jingwan thombor bad pyndik ki Khasi.
Haba kren ha kane ka jingïalang General secretary ka KSU u Bah Donal V Thabah u la ong ba ka sorkar jylla lada peit ha ki snem kiba la dep ka sngewtynnad bha ban pynmih ki Special Force ban teh lakam ïa ki lehnoh bad kiba haduh mynta bym don seng lehnoh ruh ki don beit bad shu shong beit tang ha Shillong. U la ong ba kaba donkam mynta ka long ba ka sorkar ka dei ban shna noh sa ka tnat kyrpang ki pulit ban peit beit thik tang ïa ki khappud khnang ban wanrah jingshaiñ ïa ki paidbah khappud.
U la ong ruh ba ka sorkar lyngba ka tnat Pulit ka ju kem ïa ki Khasi haba don kano kano ka jingsuba ba ki leh kam sniew namarkata ka dei ban do kum kane ka jingshlur ban kem mardor ïa ki Pulit Assam ba siat ïap ïa ki Khasi ha Mukroh.
“Hadien ba shah siat ïap ki Khasi ha ki pulit Assam kaba nyngkong tam ka sorkar ka leh ka long ban leh ka long ban pynpoi pulit sha Mawlai bad Jaïaw bad ha ka jaka ban ïakhun ïa ki pulit Assam ki khang pynban ïa ka internet kaba pynsaja shibun ïa ki samla pule” u la ong.
“Ha u snem 1979 ha ka por ba ngi beh krad ïa ki khar Bangladesh ki beh hi ki paidbah bad ha u 1992 ha ka por u bah Bull ban beh ïa ki Nepali ruh beh hi ki riewpaidbah ym ki pulit, namarkata, ngim donkam pulit satia hangne ban ïada ïa ngi namar ngi lah hi ban ïada,” u la ong
Shuh shuh u la ong ba ka seng hi kam sngew phylla ba ki pulit kim ai jingïada ïa ki Khasi bad ïakhun ïa ki pulit Assam namar u heh duh ki pulit uba ka sorkar ka thung ha ka jylla ruh u dei uba na Assam.
Ha kane ka sngi la ïoh ruh ïa ka jingkren na u President ka RBYF u Bah Bipul Thangkhiew, President ka FKJGP u Bah Dundee Khongsit, Bah sadon Blah, President HNYFbad kiwei kiwei.
