Mih ka sur ban pynkut noh ka jingïatrei lang ka Congress bad NPP ha KHADC

Shillong, Nailar 22 : Ka Congress ha ka jylla ka la rai ban bishar bniah bha halor ka sur kaba mih na ki nongïalam ka party na kylleng ka rilum Khasi – Jaiñtia ba ka la dei ka por ban pynkut noh ïa ka jingïatrei lang bad ka NPP ha Khasi Hills Autonomous District Council (KHADC).
Ha kajuh ka por ka party ka dang pynkhreh ruh mynta ban ïa syllok bad ki stad aiñ ban ujor pyrshah ïa ki lai ngut ki MLA ka party kiba la leit ban pynïasoh noh sha ka NPP dang shen.
Haba kren sha ki lad pathai khubor hadien ka jingïalang jong ki nongïalam ka party na kylleng ka Block jong ka Rilum Khasi – Jaiñtia kaba long ha Congress Bhavan ha kane ka sngi Palei, u President ka party, Bah Vincent H Pala u la ong, “Ngi dang ïasyllok mynta bad ki stad aiñ bad pynkhreh ïa ki kot ki sla. Ym don jingartatien shuh ïa ka.”
U President u la ïathuh ruh ba ha katei ka jingïalang kiba bun ki nongtrei party ki la pynpaw bad pynsawa ïa ka sur ba la donkam ïa ka Congress ban weng noh ïa ka jingïatrei lang bad ka NPP ha ka Executive Committee kaba ïalam da ka NPP. Hynrei u la ong ba ïa kane ki la shaniah pat ha ki nongïalam ka party kumno ban pynïaid shakhmat ïa ka kam.
Ka Congress mynta ka sah tang arngut ki MDC, kata u Bah Ronnie V Lyngdoh (uba dei ruh u MLA ka Mylliem) bad u Bah Pynshngainlang N Syiem (Mawkhar-Pynthorumkhrah). Lah ruh ban kdew hangne ba u Bah Pynshngaiñ u bat ruh kum u Deputy Chief Executive Member ka KHADC.
“Ka jingsngew jong ki nongtrei ka party ka long ba ngi dei ban leit marwei ha district council bad ki la shaniah ruh ha u President bad ka kynhun ban bishar bniah ïa ki jingïoh bad ki jingduh. Tangba kyllum lang hi ka long ba kim sngewtynnad shuh ïa ka rukom leh ka NPP bad ïa kaba jia ha ka district council. Kumta, kiba bun ki pynpaw ba ngi dei ban weng noh na ka Council,” ong u Bah Pala.
Shwa kane, u President u la ong ruh ba ka rai jong ka Congress ban kyrshan ïa ka EC ba ïalam da ka NPP ha KHADC ka dei halor ki mat ba ïadei bad ka jingpynkylla ïa ka Khyrnit ba Hynriew ha ka Riti Synshar ka Ri bad ban pynbeit thymmai ïa ki constituency shwa ka elekshon District Council.
“Ngi la shim ïa kane ka rai da ka jingthmu kaba bha ba ngi dei ban noh synniang na ka bynta ban pynkylla ïa ka Sixth Schedule bad ba ngim dei ban ailad tang ïa ka NPP bad ka BJP ban leh hi katba mon. Kata ka dei ka jingthmu jong ngi (ban ai jingkyrshan ïa ka NPP),” u la bynrap biang.
Haba bynrap lang u Working President ka Party, Bah Pynshngaiñ Syiem u la ong, “Ka sur jong ki nongtrei ka party ka long ban peit bniah ïa ka jingïatreilang jong ngi ha district council. Ïa kane la shaniah ha u President ka jylla bad ki nongïalam ban ïakren halor kane ka mat.”