Mih ka SRS Marngar, Umsaw Nongbri – Umkra ban pynkhlaiñ ïa ka Synjuk ki Rangbah Shnong Ri-Bhoi

Nongpoh, Naiwieng 08: Shibynta ban dang tynrong bad pynkhlaiñ ïaki tyrpeng jong ka kynhun ka Synjuk ki Rangbah Shnong Ri-Bhoi District, bad khamtam ban tehlakam ïaka jingroi ki kam sniew kam smeh bad ban long ki nongpeit ngor ha man ki shnong bad ban kyrshan bor ïaki Dorbar Shnong, ki nongïalam shnong na ki 22 tylli ki shnong kila mir jingmut bad shim kawei ka rai ban thaw thymmai sa kawei ka shnat treikam jong ki nongïalam shnong hapoh ka shatei jong ka Synjuk ki Rangbah Shnong, Marngar, Umsaw Nongbri – Umkra Ri-Bhoi District kaba dei ka unit ba thymmai hapoh ka jingpeit jingkhmih jong ka Synjuk ki Rangbah Shnong Ri-Bhoi District.
Ïa ki nongkitkam jong katei ka synjuk la jied naduh ka 3 tarik mynta u bnai bad la pynskhem pat mynta ka sngi ïaki nongïalam ba pura da u Bah BB Makdoh Chairman ka Synjuk ki Rangbah Shnong, Ri-Bhoi District haka jingdonlang u Bah A Lyngdoh uwei naki pulit ophisar ka Nongpoh PS.
Ki nongkitkam bala jied thymmai ha katei ka kynhun Synjuk ki Rangbah Shnong, Marngar, Umsaw Nongbri to Umkra Ri-Bhoi District ki kynthup ïa u bah BK Tmung kum u Adviser, Bah Mission Tron kum u President, Vice President bah Primos Lyngdoh, Secretary bah Phaintis Syngkli, Joint Secretary bah Luskepar Kleiñ, Joint Secretary bah Elevenson Makdoh, Publicity Secretary Singrum Shylla, Finance Secretary bah Kyrshan Pamshong bad Treasurer u bah Badashisha Lymphuid.
U Bah BB Makdoh haba kren ha kane ka sngi, u la pynpaw ka jingsngewkmen ba ki tyrpeng jong ka kynhun ki Rangbah Shnong ha Ri-Bhoi kala nang khlaiñ bad kane ka pyni ba ki Dorbar Shnong ki long kiba khlaiñ ban rat diengkhong naduh ki kam sniew kam smeh bad ban nang ai mynsiem bad ai bor ruh ba kum ki Rangbah Shnong kim dei ban shu kut ka wat skhim tang ha Block Office hynrei ban long kum ki syiem ban rung sha ki tnad ophis sorkar bapher bapher bad ban shemphang ka rukom treikam naka bynta ka jingbit jingbiang jong ka shnong bad kyntu ruh ïaki nongïalam shnong ba ki dei ban buh ka akor bad ka burom ha khmat eh khnang ba ka shnong kan kiew shaphrang haki liang baroh.
Na ka liang u Bah Mission Tron kum u President ba thymmai jong katei ka kynhun u la ong ba kane ka dei ka dak jong ka jingtylli hapdeng ki nongïalam shnong ha Ri-Bhoi bad kum u nongïalam u la kular ban trei shitrhem kumba la bynshet ïaka kam khamtam ban weng bad rat diengkhong ïaki kam sniew kam smeh bad kum u President u la mana ruh ïaki paidbah ba kim dei ban ieng ne shong dihkyiad ha shilynter u surok naduh Marngar shaduh Umkra bad ruh kiba die kyiad beaiñ hapoh ki shnong ki thaw bad lada lap naka liang ka synjuk kan sa shim da ka rai kaba tyngeh.