Mih ka poster ISIS-K ba byrngem ïa ki Garo ban mih noh na katto katne ki jaka ka WGHD hapoh u 2027

Tura, K’Lyngkot 28: Ka poster kaba byrngem bad kaba la pynkhihwin bad pynkyndit ïa baroh, kaba la kynnoh ba ka dei jong ka kynhun lehnoh ISIS-K, la lap ba la tah ha ki nar post elektrik hajan ka madan New Tura Matchakolgre, kaba don marjan bad ka jaka jong ka Law College kaba don ha Araimile ha West Garo Hills district ha ka step sngi Balang.
Ïa kane ka poster ba la tah kadei kaba la don ruh ïa ka kyrteng kum u Aminur Islam ba la kam ïa lade kum u Area Commander jong ka Plaint belt.Katkum kane ka poster ba la tah kala maham ïa ki jaitbynriew Garo kiba shong basah ha Tura, Rajabala, Phulbari, Selsela, Tikrikila bad Garobadha ba ki hap ban mih noh shwa u snem 2027. Ha kane ka kot lyngkdop kala kam trai ïa ka jaka bad kala pynmig ruh ïa ka jingai por.
Katkum ka jingong u Superintendent of Police (SP) ka West Garo Hills, Katei ka poster, kaba don ruh ïa ki dak ki shin jong ki lehnoh, bad la lap tang na ka thain Araimile bad ym shym la lap satia shawei pat ki jaka jong ka District haduh mynta. Ki pulit ki suba ba katei ka kam ka lah ban dei kaba la leh da ki riew donkti da ka jingthmu ban pynmih ïa ka jingpyntieng.
Ka dur khih lane ka video bad ki dur jong katei ka poster ki la saphriang staed ha ki social media, kaba la wanrah pat ka jingsngewkhia ïa ki paidbah nongshong shnong.
Mar ïa ioh jingtip, ki pulit mar mar kila leit sha katei ka jaka, bad ki la tar bad weng noh ïa katei ka poster, bad ki la register case ruh ha Araimile Police Station.Halor kane ki pulit kila sdang ban pynlong ka jingtohkit ban wad ïa kiba donkti bad ban pynshisha ïa ka tynrai bad ka jingshisha jong katei ka jingthoh.
Ki tyllong khubor na ki pulit ki la ïathuh ba ka jaka ba la tah ïa kitei ka poster kam don CCTV bad ka long dum bha namar ym don street light ha ka por janmiet bad kane ka buh jingeh ban ithuh ïa ki briew kiba donkti.
Katba ki bor pynïaid district kim pat pynthikna ïa ka jingdon jingïadei bad ki seng lehnoh ha kane ka por, ïa kane ka jingjia la shim khia bha, khamtam haba kheiñ ïa ka jingjan jong ka district sha u pud u sam jong ka Assam bad u pud u sam jong ka ri Bangladesh.
Na ka liang ki bor pahara bapher bapher kila pynjur bha ïa ka jingpeitngor kum shi bynta ban shimlypa ïa ki lad jingïada.
U Superintendent of Police u la pynthikna ba ka jinglong jingman ka dang don hapoh ka jingpeit bniah bad u la kyrpad ïa ki paidbah ba kin long kiba jai jai bad kidei ban kiar na kaba pynsaphriang ïa ki khubor lamler ne ki jingtip bym lah ban pynshisha, bad ban iatreilang bad ka jingtohkit katba ka nang ïaid shakhmat.