Shillong, K’Lyngkot 30 : Ka Kynhun Myntri jong ka jylla ha ka sngi Palei ka la mynjur ban don noh da ka Pla Tangka Cooperative Society kaban kyrshan bad ïarap ïa ki Self Help Groups kiba don ha ka jylla khnang ba kin lah ban pynïar bad pynheh ïa ka jingtrei kam bad ka kamai kajih jong ki.
Haba pynbna ïa kane, u Myntri Rangbah ka Jylla Conrad K Sangma u la ïathuh ba da kane ka sienjam ba ka sorkar ka shim da ka jingïatrei lang hapdeng ka tnad Community & Rural Development bad ka Centre for Research in Schemes & Policies (CRISP) ki don ïa ka thong ba kan lah ban wanrah ka jingkylla bad ka jingkyntiew ia ka kamai kajih jong ki paidbah ba don ha ki SHG.
“Lada phai sha u snem 2018 ka jingtyllun ka pisa ha ka jingpyntrei kam lyngba ki SHG ka long tang 40 klur tyngka hynrei mynta ka la kot sha ka 1000 klur tyngka. “Kane ka 1000 klur ka la don ka bynta kaba khraw na ka bynta ban kyntiew ia ka ïoh ka kot jong ka jylla khamtam ha ki nongkyndong,”u la ong.
U Myntri Rangbah u la pynshai ruh ba kawei na ki jingmyntoi kaba ki SGH ki lah ban ïoh na kane ka Pla Tangka Cooperative Society ka long ban pynsuk ïa ki SHG ha kaban ïoh ïa ki jingkyrshan pisa na ka bynta ban pynheh ïa ka jingtreikam ne ka kamai kajih jong ki khlem da donkam satia ban ïaid lyngba ki Bank ban ïoh ïa ka jingnang kyrshan pisa.
D kane ka sienjam u ong ba ka Meghalaya kan dei ka jylla kaba saw kaban pyntreikam ïa kane ka buit nalor ka Rajasthan, Andhra Pradesh bad ka Telangana.
Shwa kane u Myntri Rangbah u la pyntip ruh ba ka jingdon ki SHG ha ka jylla ka la kiew na ka 4000 ngut ha u snem 2018 sha ka 51,674 tylli mynta.
